संबंधित माहिती
- ज्या कंपनीच्या विमानात वडिलांचा अपघात झाला, त्याच कंपनीच्या विमानातून पार्थ पवारांचा प्रवास; राजकीय वर्तुळात चर्चांना उधाण
- आदित्य ठाकरे शिवसेनेचे कार्याध्यक्ष होणार? राजकीय वर्तुळात चर्चांना उधाण
- तुमच्या घरातील जुन्या कागदपत्रांत दडलाय जगाचा वारसा! 'हर घर दस्तक' मोहिमेद्वारे सरकार जतन करणार ऐतिहासिक ठेवा
- "मला मराठी येते, माझ्या रिक्षात येऊन बसा," रिक्षा चालकांना मराठी शिकवण्यासाठी मनसेने 'स्टिकर मोहीम' सुरू केली
- मीरा रोड हल्ल्याचा ISIS शी संबंध उघड; आरोपीकडून आयसिसशी संबंधित संशयास्पद चिठ्ठ्या जप्त करण्यात आल्या
सत्तासंघर्ष: सुनेत्रा पवार फडणवीसांच्या भेटीला; वर्षा बंगल्यावर तासभर चर्चा, राजकीय वर्तुळात चर्चांना उधाण
मुंबई: महाराष्ट्राच्या राजकारणात सध्या विधान परिषद निवडणुकीच्या निमित्ताने मोठ्या हालचालींना वेग आला आहे. गुरुवारी सकाळी उपमुख्यमंत्री सुनेत्रा पवार यांनी मुख्यमंत्री देवेंद्र फडणवीस यांची 'वर्षा' निवासस्थानी भेट घेतल्याने राजकीय चर्चांना उधाण आले आहे. साधारण पाऊण तास चाललेल्या या भेटीमुळे ऐन निवडणुकीच्या तोंडावर नवी समीकरणे जुळणार का? याकडे सर्वांचे लक्ष लागले आहे.
काय घडलं भेटीत?
सुनेत्रा पवार आणि देवेंद्र फडणवीस यांच्यात झालेली ही चर्चा नेमकी कोणत्या विषयावर होती, हे अधिकृतपणे गुलदस्त्यात असले तरी, विधान परिषद निवडणुकीतील जागावाटप आणि उमेदवार निवडीबाबत यात खलबतं झाल्याची दाट शक्यता वर्तवली जात आहे.
राष्ट्रवादीचा हुकमी एक्का कोण?
दुसरीकडे, राष्ट्रवादी काँग्रेसमध्ये (अजित पवार गट) उमेदवारीबाबत मोठी खळबळ सुरू आहे. सूत्रांकडून मिळालेल्या माहितीनुसार, राष्ट्रवादीकडून माजी आमदार झीशान सिद्दिकी यांच्या नावावर शिक्कामोर्तब होण्याची शक्यता आहे. पक्षातील वरिष्ठ नेत्यांच्या बैठकीनंतर हे नाव आघाडीवर आले असून, लवकरच याची अधिकृत घोषणा होऊ शकते.
इतर पक्षांची काय स्थिती?
शिवसेना (शिंदे गट): एकनाथ शिंदे यांच्या नेतृत्वाखाली झालेल्या बैठकीत निलम गोऱ्हे यांचे नाव जवळपास निश्चित मानले जात आहे. दुसऱ्या जागेसाठी बच्चू कडू यांच्या नावाचीही चर्चा आहे.
निवडणूक वेळापत्रक: १२ मे रोजी मतदान होणार असून, उमेदवारी अर्ज भरण्याची प्रक्रिया आता अंतिम टप्प्यात आहे.
पुढील काही दिवसांत महायुतीमधील जागांचे वाटप आणि उमेदवारांची अंतिम यादी स्पष्ट होईल. मात्र, सुनेत्रा पवारांच्या या भेटीने शेवटच्या क्षणी राजकारणाची सूत्रं नेमकी कोणाकडे फिरणार, याची उत्सुकता वाढली आहे.
