सततच्या लैंगिक छळाला कंटाळून अल्पवयीन मुलीने क्रिकेट बॅटने वडिलांची हत्या केली; नागपूरमधील घटना
महाराष्ट्रातील नागपूरमध्ये एक धक्कादायक घटना समोर आली आहे, जिथे एका अल्पवयीन मुलीने क्रिकेट बॅटने वडिलांना ठार केले आहे. आरोपी मुलीचा दावा आहे की, तिचे वडील गेल्या दोन वर्षांपासून तिचा लैंगिक छळ करत होते.
मिळालेल्या माहितीनुसार नागपूरमध्ये एका १७ वर्षीय मुलीने कथितरित्या क्रिकेट बॅटने वडिलांना ठार केले आहे. पोलिसांच्या माहितीनुसार, वडील जवळपास दोन वर्षांपासून तिचा लैंगिक छळ करत होते. आरोपी अल्पवयीन मुलीचा दावा आहे की, लैंगिक छळाला कंटाळून तिने वडिलांची हत्या केली. पोलिसांनी दिलेल्या माहितीनुसार, ही घटना सोमवारी रात्री नागपूरच्या एमआयडीसी पोलीस ठाण्याच्या हद्दीत घडली. मुलीचे ४५ वर्षीय वडील रोजंदारीवर काम करणारे मजूर होते आणि ते आपली कमाई दारूवर उधळत होते. दारूच्या नशेत कुटुंबातील सदस्यांशी अनेकदा भांडायचा आणि त्यांना मारहाणही करायचा. पोलिसांनी दिलेल्या माहितीनुसार, तो नशेत असताना आपल्या अल्पवयीन मुलीला अयोग्यरित्या स्पर्श करायचा आणि तिचा विनयभंग करण्याचा प्रयत्न करायचा. पोलिसांच्या म्हणण्यानुसार, हे सुमारे दोन वर्षांपासून सुरू होते. मुलीने पोलिसांना सांगितले की, सोमवारी रात्री तो खूप नशेत घरी परतला. त्यावेळी ती घरी एकटीच होती. असा आरोप आहे की, तिच्या वडिलांनी पुन्हा तिचा विनयभंग केला पोलिसांच्या म्हणण्यानुसार मुलीने क्रिकेट बॅट उचलून वडिलांच्या डोक्यात दोनदा प्रहार केला. पोलिसांनी सांगितले की, मुलीने रात्री पोलिसांना फोन केला. मुलीला बाल न्याय मंडळासमोर हजर करण्यात आले, जिथून तिला अमरावती जिल्ह्यातील रिमांड होममध्ये पाठवण्यात आले.

