महाराष्ट्रात पुढील पाच दिवस मुसळधार पावसाची शक्यता! या जिल्ह्यांना सतर्कतेचा इशारा जारी

महाराष्ट्रातील अनेक जिल्ह्यांमध्ये पुढील पाच दिवस मेघगर्जना, विजांचा कडकडाट आणि मुसळधार पावसाचा ऑरेंज आणि यलो अलर्ट जारी केला आहे. राज्य आपत्ती व्यवस्थापन विभागाने जनतेला खराब हवामानात विशेष खबरदारी घेण्याचे आणि स्थानिक प्रशासनाच्या सूचनांचे पालन करण्याचे आवाहन केले आहे.

हवामान विभागाच्या माहितीनुसार, पुणे, सातारा आणि कोल्हापूरच्या घाट परिसरात मुसळधार पावसाची शक्यता लक्षात घेऊन आज ऑरेंज अलर्ट जारी करण्यात आला आहे. नंदुरबार, नाशिक घाट क्षेत्र, ठाणे, रायगड, रत्नागिरी, बुलढाणा, अकोला, वाशीम, अमरावती, यवतमाळ, वर्धा, नागपूर, भंडारा, चंद्रपूर, गोंदिया आणि गडचिरोली जिल्ह्यांसाठी पिवळा अलर्ट जारी करण्यात आला आहे.

तसेच ३ ऑगस्ट रोजी रत्नागिरी, सातारा घाट क्षेत्र, बुलढाणा, अकोला, अमरावती आणि नागपूर जिल्ह्यांसाठी पिवळा अलर्ट लागू राहील. तर ४ ऑगस्ट रोजी बुलढाणा, यवतमाळ, वर्धा, नागपूर, भंडारा, गोंदिया, चंद्रपूर आणि गडचिरोली जिल्ह्यांमध्ये मेघगर्जना आणि विजांच्या कडकडाटासह पावसाची शक्यता आहे. ५ ऑगस्ट रोजी बुलढाणा, वर्धा, नागपूर, भंडारा, गोंदिया, चंद्रपूर आणि गडचिरोली जिल्ह्यांसाठी यलो अलर्टही जारी करण्यात आला आहे.

हवामानाची परिस्थिती लक्षात घेता, आपत्ती व्यवस्थापन पथके आणि स्थानिक प्रशासनांना सतर्क करण्यात आले आहे.

Edited By- Dhanashri Naik