मुंबई शहर व उपनगरातील पोलीसांची ड्युटी आता ८ तासांची
नविन वर्षात मुंबई शहर व उपनगरातील प्रत्येक पोलीस ठाण्यात कार्यरत असलेल्या कर्मचाऱ्यांची ड्युटी ८ तासांची करण्यात आली आहे. याबाबत पोलीस आयुक्त दत्ता पडसलगीकर यांनी १ जानेवारीपासून सर्व ९२ पोलीस ठाण्यांत या निर्णयाची अंमलबजावणी करण्याचे आदेश सर्व पोलीस ठाणी व विभागाच्या प्रभारी अधिकाऱ्यांना दिले आहेत. या वेळापत्रकानुसार, तीन सत्रांमध्ये पोलिसांच्या ड्युटीचे नियोजन करण्यात आले आहे. गेल्या सात महिन्यांपासून त्याची प्रायोगिक तत्त्वावर काही पोलीस ठाण्यांत कार्यवाही केली जात होती. आता सर्वच पोलीस ठाण्यांत त्याची अंमलबजावणी केली जाणार आहे.
