नाशिक विभाग पदवीधर मतदार संघ निवडणुकीच्या उमेदवारी अर्ज मागे घेण्याच्या शेवटच्या दिवशी 6 उमेदवारांनी अर्ज मागे घेतले असून 16 उमेदवार निवडणुकीच्या रिंगणात आहेत, अशी माहिती सहा.निवडणूक निर्णय अधिकारी नाशिक विभाग पदवीधर मतदार संघ तथा उपायुक्त (सा.प्र.) रमेश काळे यांनी दिली आहे.
अमोल बाळासाहेब खाडे, डॉ.सुधीर सुरेश तांबे, दादासाहेब हिरामण पवार, धंजनय क्रिष्णा जाधव, राजेंद्र दौलत निकम, धनराज देविदास विसपुते या सहा उमेदवारांनी पदवीधर मतदार संघ निवणुकीतून माघार घेतली आहे. त्यामुळे आता रिंगणात १६ उमेदवार आहेत. या निवडणुकीत उमेदवारी अर्ज भरतांना हायव्होल्टेज ड्रामा चर्चेचा ठरला. काँग्रेस आणि भाजप या दोन्ही प्रमुख पक्षांचे उमेदवार या निवडणुकीत अधिकृतपणे नसल्यामुळे या निवडणुकीत कोणता पक्ष कोणाला पाठींबा देतो यावर त्यांचे भविष्य अवलंबून आहे. या निवडणुकीत अपक्ष उमेदवार सत्यजित तांबे विरुद्ध शुभांगी पाटील यांच्यात सामना होणार असल्याचे तूर्त तरी चित्र आहे. पाटील यांना ठाकरे गटाने पाठींबा दिला आहे. त्यामुळे काँग्रेस आणि राष्ट्रवादी काँग्रेस यांच्या महाविकास आघाडीचा पाटील यांना पाठिंबा लाभला आहे. तर, तांबे यांना भाजप पाठिंबा देण्याची शक्यता आहे.
रतन कचरु बनसोडे, नाशिक वंचित बहुजन आघाडी, सुरेश भिमराव पवार, नाशिक नॅशनल ब्लॅक पँथर पार्टी, अनिल शांताराम तेजा, अपक्ष, अन्सारी रईस अहमद अब्दुल कादीर,धुळे अपक्ष, अविनाश महादू माळी, नंदूरबार अपक्ष, इरफान मो असहाक,मालेगाव जि.नाशिक अपक्ष, ईश्वर उखा पाटील,धुळे अपक्ष, बाळासाहेब रामनाथ घोरपडे,नाशिक,अपक्ष, ॲड. जुबेर नासिर शेख,धुळे अपक्ष, ॲड.सुभाष राजाराम जंगले,श्रीरामपुर, अपक्ष, सत्यजित सुधीर तांबे,संगमनेर, अपक्ष, नितीन नारायण सरोदे, नाशिक अपक्ष, पोपट सिताराम बनकर, अहमदनगर, अपक्ष, शुभांगी भास्कर पाटील,धुळे अपक्ष, सुभाष निवृत्ती चिंधे, अहमदनगर, अपक्ष, संजय एकनाथ माळी,जळगाव,अपक्ष असे एकूण 16 उमेदवार निवडणुक लढविणार आहेत.
Edited by : Ratnadeep Ranshoor
