नाशिकमध्ये नातेवाईकाच्या अंत्यविधीसाठी निघालेल्या नवविवाहित जोडप्याचा अपघातात मृत्यू
महाराष्ट्रातील नाशिक जिल्ह्यातील कळवण येथे मॅक्स गाडी आणि दुचाकी यांच्यात झालेल्या धडकेत एका नवविवाहित जोडप्याचा मृत्यू झाला. या जोडप्याचे लग्न याच वर्षी मे महिन्यात झाले होते. या अपघातात एक तरुणी गंभीर जखमी झाली आहे.
मिळालेल्या माहितीनुसार नाशिक जिल्ह्यात कळवण तालुक्यातील पिलकोस फाट्याजवळ मॅक्स गाडी आणि दुचाकी यांच्यात झालेल्या भीषण धडकेत एका नवविवाहित जोडप्याचा मृत्यू झाला. त्यांच्यासोबत असलेली एक तरुणी या अपघातात गंभीर जखमी झाली असून तिच्यावर उपचार सुरू आहे. मृतांची ओळख दिनेश गवीत आणि कीर्ती गवीत अशी पटली आहे. ते एका नातेवाईकाच्या अंत्यविधीसाठी प्रतापपूरला जात असताना त्यांच्या दुचाकीची मॅक्स गाडीला धडक बसली. घटनास्थळी पोहोचलेल्या स्थानिकांनी तात्काळ बचावकार्य सुरू केले आणि तिन्ही जखमींना रुग्णालयात दाखल केले. मात्र, उपचारादरम्यान दिनेश आणि कीर्ती या दोघांचाही मृत्यू झाला.
या अपघातातील सर्वात दुःखद बाब म्हणजे दिनेश आणि कीर्ती यांचे लग्न याच वर्षी मे महिन्यात झाले होते. लग्नानंतर अवघ्या दोन महिन्यांत रस्ते अपघातात झालेल्या त्यांच्या मृत्यूमुळे कुटुंब दुःखात बुडाले आहे. संपूर्ण गाव शोकसागरात बुडाले आहे.
Edited By- Dhanashri Naik
