महाराष्ट्रात गुइलेन-बॅरे सिंड्रोमचा उद्रेक,225 रुग्णांची नोंद, 12 जणांचा मृत्यू
महाराष्ट्रात गिलेन-बॅरे सिंड्रोम (GBS) चे अधिक रुग्ण आढळल्याने, संशयित आणि पुष्टी झालेल्या रुग्णांची संख्या 225 वर पोहोचली आहे. आरोग्य विभागाच्या एका अधिकाऱ्याने ही माहिती दिली. यापैकी आतापर्यंत 197प्रकरणांची पुष्टी झाली आहे. तर 28 जण सध्या संशयित आहेत. या आजारामुळे आतापर्यंत 12 जणांना आपला जीव गमवावा लागला आहे. यापैकी सहा जणांच्या मृत्यूची पुष्टी झाली आहे. तर सहा मृत्यू अजूनही संशयास्पद आहेत.
आतापर्यंत179 रुग्ण या प्राणघातक आजारातून बरे झाले आहेत आणि त्यांना रुग्णालयातून डिस्चार्ज देण्यात आला आहे. सध्या 24 जण अतिदक्षता विभागात आहेत. सध्या 15 जणांना व्हेंटिलेटर सपोर्टवर ठेवण्यात आले आहे. दरम्यान, महाराष्ट्राचे उपमुख्यमंत्री अजित पवार यांनी 'गिलेन-बॅरे सिंड्रोम' (GBS) च्या अलिकडच्या घटनांमध्ये खबरदारीचा उपाय म्हणून लोकांना कमी शिजवलेले चिकन खाणे टाळण्याचे आवाहन केले होते.
जीबीएस हा एक दुर्मिळ न्यूरोलॉजिकल डिसऑर्डर आहे ज्यामध्ये एखाद्या व्यक्तीची रोगप्रतिकारक शक्ती प्रभावित होते आणि शरीराचे काही भाग अचानक सुन्न होतात. स्नायू कमकुवत होतात आणि गिळण्यास किंवा श्वास घेण्यास त्रास होतो. जीबीएस संसर्ग दूषित पाणी आणि अन्नाद्वारे होऊ शकतो
महाराष्ट्रात त्याची प्रकरणे आणखी वाढू शकतात. राज्यात, पुणे महानगरपालिका, पिंपरी चिंचवड महानगरपालिका, पुणे ग्रामीण आणि इतर जिल्ह्यांमध्ये या आजाराचे रुग्ण आढळले आहेत. याबाबत, आरोग्य अधिकारी परिस्थितीवर बारकाईने लक्ष ठेवून आहेत. येथील वैद्यकीय सुविधांना सतर्क ठेवण्यात आले आहे.
लोकांना फक्त उकळलेले पाणी पिण्याचा आणि ताजे, स्वच्छ अन्न खाण्याचा सल्ला देण्यात आला आहे. आरोग्य धोक्यांना कमी करण्यासाठी, लोकांनी शिळे किंवा अर्धवट शिजवलेले अन्न, विशेषतः चिकन आणि मटण खाणे टाळावे. आरोग्य विभागाचे म्हणणे आहे की परिस्थिती नियंत्रणात आहे आणि लोकांनी घाबरून जाण्याची गरज नाही.
Edited By - Priya Dixit
