प्रदीप पूर्णेकर हत्या प्रकरण: मुख्य आरोपी मंदिरात लपून बसला होता; ठाणे पोलिसांनी ठोकल्या बेडया

मिळालेल्या माहितीनुसार शिवसेना (यूबीटी) नेते प्रदीप पूर्णेकर यांच्या हत्या प्रकरणात पोलिसांना मोठे यश मिळाले आहे. शुक्रवारी, उत्तर प्रदेशातून दोघांना अटक करण्यात आली. २९ सप्टेंबर रोजी झालेल्या हत्येमध्ये त्यांचा सहभाग असल्याचा आरोप आहे. ठाणे पोलिसांच्या एका अधिकाऱ्याने ही माहिती दिली. या दोन अटकांमुळे या प्रकरणातील आरोपींची एकूण संख्या पाच झाली आहे.

पोलीस अधिकाऱ्याने सांगितले की, संतोष कनोजिया उर्फ ​​तल्ली आणि अमित सिंग उर्फ ​​पपलू यांना अटक करण्यात आली आहे. ठाणे पोलिसांच्या पथकाने त्यांना उत्तर प्रदेशातील प्रयागराज येथून अटक केली. अधिकाऱ्यांच्या म्हणण्यानुसार, संतोष कनोजिया अटक टाळण्यासाठी एका मंदिरात लपून बसला होता. सूत्रांनी सांगितले की, कनोजिया देशाबाहेर पळून गेल्याचा किंवा दुसऱ्या राज्यात गेल्याचा संशय असल्याने त्याच्याविरोधात लुकआऊट सर्क्युलर आधीच जारी करण्यात आले होते. पोलिस अधिकाऱ्याने स्पष्ट केले की, हेल्मेट घातलेल्या हल्लेखोराची ओळख पटवणे हा तपासाचा एक मोठा भाग होता. अधिकारी म्हणाले, "हा हेल्मेट घातलेला माणूस कनोजियासोबत घटनास्थळी आला होता. आता आम्हाला समजले आहे की, हेल्मेट घातलेला माणूस अमित सिंग आहे. तो ठाणे जिल्ह्यातील मीरा भाईंदर भागाचा रहिवासी आहे."

यापूर्वी, ठाणे पोलिसांच्या विशेष तपास पथकाने सुभाष उर्फ ​​पप्प्या शिंदे, निखिल यादव आणि नितेश पवार यांना अटक केली होती. पोलिस अधिकाऱ्यांच्या म्हणण्यानुसार, कनोजिया आणि शिंदे यांनी हत्येचा कट रचला होता. त्यांनी शस्त्रे आणि इतर आवश्यक साहित्याची व्यवस्था केली होती. यात हत्येसाठी वापरलेल्या वाहनाचा समावेश होता. अधिकाऱ्याने सांगितले की, गुन्हा केल्यानंतर लगेचच आरोपी रायगड जिल्ह्याच्या दिशेने पळून गेले. त्यानंतर ते उत्तरेकडे गेले आणि गुन्ह्याच्या ठिकाणापासून सुमारे १,५०० किलोमीटर अंतरावर असलेल्या उत्तर प्रदेशातील प्रयागराज येथे पोहोचले. अधिकाऱ्याने सांगितले की, उत्तर प्रदेशात एका विशेष मोहिमेदरम्यान कानोजिया आणि सिंग यांना अटक करण्यात आली.