एसटी बस स्थानके आता होणार ‘सौरऊर्जेवर प्रताप सरनाईक यांची माहिती
एसटीच्या बस स्थानकांचा आणि आगारांचा वीज वापर आता सौरऊर्जेद्वारे भागवला जाणार असून, या महत्त्वाकांक्षी ‘एसटी सौर ऊर्जा प्रकल्पा’च्या पहिल्या टप्प्याला आता प्रत्यक्ष सुरुवात झाली आहे. परिवहन मंत्री प्रताप सरनाईक यांनी यासंदर्भात महत्त्वाची माहिती दिली आहे.
राज्य परिवहन महामंडळाने विजेवरील खर्च कमी करण्यासाठी एक महत्त्वाकांक्षी पाऊल उचलले आहे. या प्रकल्पांतर्गत राज्यात एकूण २५७ मेगावॅट (MW) क्षमतेचे ‘ग्रिड सोलर प्रोजेक्ट’ (MSRTC Solar Project) उभारण्यास प्रशासकीय मान्यता मिळाली आहे.
यामुळे एसटी महामंडळ वीज बिलाच्या बाबतीत स्वावलंबी होण्यास मोठी मदत होणार आहे. सौरऊर्जेचा हा वापर केवळ आर्थिक बचतीसाठीच नव्हे, तर कार्बन उत्सर्जन कमी करून एसटीचा प्रवास अधिक ‘ग्रीन’ आणि पर्यावरणपूरक करण्यासाठी महत्त्वपूर्ण ठरेल. या योजनेच्या पहिल्या टप्प्यात प्रमुख बस स्थानके आणि मोठ्या आगारांची निवड करण्यात आली असून, तिथे सौर पॅनेल बसवण्याच्या कामाला आता वेग आला आहे.”
एसटी महामंडळाने राज्यभरातील आपल्या बस स्थानके आणि आगारांच्या इमारतींवर सौर पॅनेल बसवण्याचे नियोजन केले आहे.
या प्रकल्पामुळे एसटी महामंडळाचे दरवर्षी कोट्यवधी रुपये वाचणार आहेत. वाचलेली ही रक्कम एसटीच्या इतर सेवा सुधारण्यासाठी, नवीन बसेसच्या खरेदीसाठी किंवा प्रवासी सुविधा वाढवण्यासाठी वापरली जाऊ शकते.
तसेच, लोडशेडिंगच्या काळातही बस स्थानकांवरील वीजपुरवठा खंडित होणार नाही, ज्यामुळे प्रवाशांची मोठी सोय होणार आहे. परिवहन मंत्र्यांनी दिलेल्या माहितीनुसार, हा प्रकल्प टप्प्याटप्प्याने संपूर्ण महाराष्ट्रात राबवला जाणार आहे.
Edited By - Priya Dixit
