रायगड, रत्नागिरी, सातारा यासह पश्चिम महाराष्ट्रातील काही भागांसाठी रेड अलर्ट

भारतीय हवामान विभागाने (IMD) देशातील अनेक राज्यांतील विविध जिल्ह्यांसाठी ऑरेंज आणि रेड अलर्ट जारी केला आहे. आयएमडीने सांगितले की, वायव्य बंगालच्या उपसागर, ओडिशा, उत्तर आंध्र प्रदेश किनारपट्टीवर कमी दाबाचे क्षेत्र तयार होत आहे. त्यामुळे जवळपासच्या अनेक राज्यांच्या हवामानात बदल होणार आहे. भुवनेश्वर हवामान केंद्राने सांगितले की, पुढील ४८ तासांत ओडिशा आणि छत्तीसगडमध्ये पाऊस पडण्याची शक्यता आहे.

हवामान खात्याने सांगितले की, उत्तर प्रदेश, केरळ, कर्नाटक, दिल्ली-एनसीआर सारख्या अनेक राज्यांमध्ये मुसळधार पावसाची शक्यता आहे. आपल्या ताज्या हवामान अंदाजात, IMD ने म्हटले आहे की ओडिशा, छत्तीसगड, विदर्भ, गुजरात, कोकण, गोवा, मध्य महाराष्ट्र आणि तेलंगणामध्ये पुढील 2-3 दिवसांत मुसळधार पाऊस पडण्याची शक्यता आहे.

महाराष्ट्राच्या काही भागात रेड अलर्ट –

IMD ने पुणे आणि रायगड, रत्नागिरी, सातारा यासह पश्चिम महाराष्ट्रातील काही भागांसाठी रेड अलर्ट जारी केला आहे. IMD ने पालघर, ठाणे, सिंधुदुर्ग आणि कोल्हापुरात मुसळधार ते अति मुसळधार पावसासाठी ऑरेंज अलर्ट जारी केला आहे. दरम्यान, रायगड, रत्नागिरी, पुणे आणि सातारा येथे जोरदार पावसाची शक्यता वर्तवण्यात आली आहे. नागपूर, वर्धा, गोंदिया आणि वाशीमसह महाराष्ट्रातील काही भागांमध्येही यलो अलर्ट जारी करण्यात आला आहे.