1. मराठी बातम्या
  2. महाराष्ट्र न्यूज
  3. महाराष्ट्र माझा
  4. Shiv Sena Finalizes Ravindra Phatak's Candidacy in Thane Legislative Council Election

ठाणे विधान परिषद निवडणूक: शिवसेनेकडून रवींद्र फाटक यांचे नाव निश्चित; क्षितीज ठाकूरांच्या उमेदवारीच्या चर्चांना पूर्णविराम

ठाणे: स्थानिक स्वराज्य संस्था मतदारसंघाच्या आगामी विधान परिषद निवडणुकीसाठी मुख्यमंत्री एकनाथ शिंदे यांच्या शिवसेनेने आपला मोहरा निश्चित केला आहे. अत्यंत प्रतिष्ठेच्या मानल्या जाणाऱ्या ठाणे विधान परिषदेच्या जागेसाठी रवींद्र फाटक यांची उमेदवारी जवळपास निश्चित झाली असून, मुख्यमंत्री एकनाथ शिंदे यांच्याकडून लवकरच याची अधिकृत घोषणा केली जाणार आहे.
 
ठाकूर कुटुंबियांची भेट आणि विलीनीकरणाची चर्चा
यापूर्वी ठाणे मतदारसंघातून बहुजन विकास आघाडीचे (बविआ) नेते क्षितीज ठाकूर यांना शिवसेनेकडून उमेदवारी दिली जाणार असल्याची राजकीय चर्चा रंगली होती. यासाठी मुख्यमंत्री एकनाथ शिंदे यांनी हितेंद्र ठाकूर यांच्यासमोर बहुजन विकास आघाडी हा पक्ष शिवसेनेत विलीन करण्याचा प्रस्ताव ठेवल्याचे बोलले जात होते. मात्र, शिवसेना सूत्रांनी दिलेल्या माहितीनुसार, पक्षांच्या विलीनीकरणाबाबत सध्या कोणतीही बोलणी सुरू नाही.
 
पक्ष विलीनीकरणाची चर्चा फेटाळली असली तरी, उमेदवारी निश्चित होताच रवींद्र फाटक यांनी दोन दिवसांपूर्वीच 'बविआ'चे सर्वेसर्वा हितेंद्र ठाकूर आणि क्षितीज ठाकूर यांची भेट घेऊन चर्चा केली. वसई-विरार भागात बहुजन विकास आघाडीचे ७१ नगरसेवक असून, बविआचा पाठिंबा मिळाल्यास या निवडणुकीत रवींद्र फाटक यांना मोठा फायदा होणार आहे.
 
शिवसेनेच्या वाट्याला ४ जागा
महायुतीमध्ये शिवसेनेने सुरुवातीला ६ जागांची मागणी केली होती, ज्यामध्ये प्रामुख्याने नाशिक, ठाणे आणि जळगावच्या जागांचा समावेश होता. आतापर्यंत झालेल्या जागावाटपाच्या बैठकीत शिवसेनेला ठाणे, नाशिक, यवतमाळ आणि परभणी अशा चार जागा मिळाल्याची माहिती समोर आली आहे.
 
निवडणूक का रखडली होती?
राज्यात गेल्या दोन-अडीच वर्षांपासून स्थानिक स्वराज्य संस्थांच्या निवडणुका न झाल्यामुळे या मतदारसंघातील आमदारांचा कार्यकाळ संपूनही निवडणुका घेता आल्या नव्हत्या. अखेर आता या रिक्त जागांसाठी निवडणूक कार्यक्रम जाहीर झाला असून १८ जून रोजी मतदान तर २२ जून रोजी मतमोजणी होणार आहे.
 
निवडणुकीचा महत्त्वाचा कार्यक्रम:
उमेदवारी अर्ज भरण्याची शेवटची तारीख: १ जून २०२६
उमेदवारी अर्जांची छाननी: २ जून २०२६
अर्ज मागे घेण्याची मुदत: ४ जून २०२६
मतदान: १८ जून २०२६ (सकाळी ८ ते दुपारी ४)
मतमोजणी व निकाल: २२ जून २०२६
About Writer
वेबदुनिया न्यूज टीम
वेबदुनियाच्या न्यूज डेस्क येथे आमचे वार्ताहर, विश्वसनीय स्रोत आणि अनुभवी पत्रकार यांनी तयार केलेले प्रत्यक्ष घटनास्थळावरील अहवाल, विशेष वृत्तांत, मुलाखती आणि रिअल-टाइम अपडेट्स प्रकाशित करण्यापूर्वी वरिष्ठ संपादकांकडून अत्यंत काटेकोरपणे तपासून घेतली जातात..... आणखी वाचा
पुढील लेख
महाराष्ट्रातील आणखी एका रेल्वे स्थानकाचे नाव बदलणार, मंत्रिमंडळाची मंजुरी