महाराष्ट्रात बिटकॉइन घोटाळ्याप्रकरणी सीबीआयची कारवाई, एफआयआर दाखल

Mumbai News : महाराष्ट्रातील 6,600 कोटी रुपयांच्या 'बिटकॉईन' घोटाळ्याची सीबीआयने बुधवारी चौकशी सुरू केली. तसेच प्राथमिक तपासात या घोटाळ्यातील मुख्य आरोपींविरुद्ध गुन्हा दाखल करण्यात आला आहे. या प्रकरणी आणखी एका आरोपीला चौकशीसाठी बोलावण्यात आले आहे.

मिळालेल्या माहितीनुसार, सर्वोच्च न्यायालयाच्या आदेशानंतर ही चौकशी सुरू झाली. एफआयआरमध्ये मुख्य आरोपी अमित भारद्वाज आणि अजय भारद्वाज यांची नावे आहे. अमितचा यापूर्वी हृदयविकाराच्या झटक्याने मृत्यू झाला होता, तर अजय अद्याप फरार असून त्याचा शोध सुरू आहे.

तसेच या प्रकरणी सीबीआयने या प्रकरणातील आरोपी गौरव मेहता यालाही समन्स बजावले असून, लवकरात लवकर तपास अधिकाऱ्यांसमोर हजर राहण्यास सांगितले आहे. भारद्वाजनी गुंतवणूकदारांची फसवणूक केल्याचा आरोप यापूर्वी ईडीने केला होता आणि त्याआधारे दिल्ली, पुणे आणि इतर काही ठिकाणी एफआयआर नोंदवण्यात आला होता. त्यानंतर सीबीआयचा तपास सुरू झाला.

सर्वप्रथम भारतीय पोलीस सेवेतील माजी अधिकारी म्हणजेच IPS रवींद्रनाथ पाटील यांनी सुप्रिया सुळे आणि नाना पटोले यांच्यावर गंभीर आरोप केले. ते म्हणाले की, सुप्रिया सुळे आणि नाना पटोले यांनी 2018 च्या क्रिप्टोकरन्सी फसवणूक प्रकरणात बिटकॉइनचा गैरवापर केला आणि महाराष्ट्र विधानसभा निवडणुकीत त्याचा वापर केला. तसेच पुण्याचे तत्कालीन पोलिस आयुक्त अमिताभ गुप्ता यांच्यासह सायबर गुन्ह्याचा तपास सांभाळणाऱ्या तत्कालीन पोलिस उपायुक्त भाग्यश्री नौटके यांचाही या घोटाळ्यात सहभाग असल्याचा आरोप त्यांनी केला.

Edited By- Dhanashri Naik