तीन सुवर्णपदके जिंकणाऱ्या भारतीय खेळाडू नीरज यादवने केली आत्महत्या

भारतीय पॅरा ॲथलेटिक्स विश्वातून एक दुःखद बातमी समोर आली आहे. आशियाई पॅरा गेम्समध्ये तीन सुवर्णपदके जिंकणारे ज्येष्ठ भारतीय खेळाडू नीरज यादव यांनी आत्महत्या केल्याचे वृत्त आहे. ४२ वर्षीय नीरजच्या मृत्यूच्या बातमीने क्रीडाविश्वात खळबळ उडाली आहे. डोपिंग बंदीमुळे तो या महिन्याच्या आशियाई पॅरा गेम्समध्ये सहभागी होऊ शकला नाही, असे वृत्त आहे. तथापि, त्याच्या मृत्यूचे नेमके कारण आणि परिस्थिती अद्याप निश्चित झालेली नाही.

भारतीय पॅरा ॲथलेटिक्स संघाचे मुख्य प्रशिक्षक एस. सत्यनारायण यांनी नीरज यादवच्या मृत्यूची पुष्टी केली. वृत्तानुसार, नीरजने कथितरित्या घरी विष प्राशन केले. २८ ऑक्टोबर रोजी दिल्लीतील एका रुग्णालयात शवविच्छेदन केले जात होते. सत्यनारायण यांनी या घटनेवर दुःख व्यक्त करत म्हटले, "नीरजने आत्महत्या केली. हे घडणे अत्यंत दुर्दैवी आहे." त्यांनी असेही सांगितले की, या निर्णयामागील नेमक्या कारणावर ते भाष्य करू शकत नाहीत. तथापि, खेळाडूंनी आपल्या कारकिर्दीतील चढ-उतारांना संयमाने सामोरे जावे, असे त्यांचे मत आहे.

नीरज यादव हा भारताच्या सर्वात यशस्वी पॅरा-ॲथलीटपैकी एक मानला जात होता. त्याने आशियाई पॅरा गेम्समधील आपल्या कामगिरीने देशाला गौरव मिळवून दिला. त्याने जकार्ता येथे झालेल्या २०१८ च्या आशियाई पॅरा गेम्समध्ये भालाफेक स्पर्धेत सुवर्णपदक जिंकले होते. त्यानंतर, चीनमधील हांगझू येथे झालेल्या २०२३ च्या आशियाई पॅरा गेम्समध्ये नीरजने भालाफेक आणि थाळीफेक या दोन्ही स्पर्धांमध्ये सुवर्णपदके जिंकली. हे त्याचे आशियाई पॅरा गेम्समधील तिसरे सुवर्णपदक होते.