बीएमसीने अजय देवगणच्या बंगल्याला नोटीस बजावली! कारण काय?

प्रसिद्ध बॉलिवूड अभिनेता अजय देवगण पुन्हा एकदा चर्चेत आहे, पण यावेळी त्याच्या नवीन चित्रपटामुळे नाही, तर मुंबईतील त्याच्या आलिशान बंगल्यामुळे. बीएमसीने मुंबईच्या पॉश जुहू भागातील त्याच्या बंगल्यातील सुरू असलेल्या बांधकामास काम थांबवण्याची नोटीस बजावली आहे. बीएमसीच्या या कारवाईमुळे मनोरंजन विश्वात खळबळ उडाली आहे आणि 'सिंघम' फेम अजय देवगणच्या बंगल्यावरील या अचानक कारवाईमागील खरे कारण जाणून घेण्यासाठी प्रत्येकजण उत्सुक आहे. वृत्तानुसार, या संपूर्ण वादामागे अजय देवगण यांच्या बंगल्याचा प्रस्तावित व्यावसायिक वापर हे मुख्य कारण आहे. जुहू येथील कापोल सहकारी गृहनिर्माण सोसायटीमध्ये अजय देवगण यांचा ७,८०२ चौरस फुटांचा एक भव्य बंगला आहे. ही मालमत्ता एक प्रीमियम सलून आणि स्पा केंद्र चालवण्यासाठी भाड्याने दिली जात असल्याचे वृत्त होते. मात्र, ज्या सोसायटीमध्ये ही मालमत्ता आहे, ती पूर्णपणे एक निवासी संकुल आहे. रहिवाशांनी या परिसरात व्यावसायिक उपक्रम, विशेषतः स्पा आणि सलून सुरू करण्यास तीव्र विरोध केला आणि आवश्यक परवानग्यांवर प्रश्नचिन्ह उपस्थित केले. कापोल गृहनिर्माण सोसायटीने देवगण कुटुंबाला या व्यावसायिक वापराशी संबंधित आवश्यक कागदपत्रे आणि अधिकृत परवानग्या सादर करण्यास सांगितले, तेव्हा हे प्रकरण अधिकच चिघळले. देवगण कुटुंबाने वेळेवर आवश्यक कागदपत्रे दिली नाहीत किंवा समाधानकारक प्रतिसादही दिला नाही, असा सोसायटीचा आरोप आहे. यानंतर, सोसायटीच्या सदस्यांनी बृहन्मुंबई महानगरपालिकेच्या के-वेस्ट वॉर्डमध्ये लेखी तक्रार दाखल केली. तक्रार मिळाल्यानंतर, बीएमसी अधिकाऱ्यांनी या प्रकरणाची दखल घेतली आणि आवश्यक कागदपत्रे सादर न केल्यामुळे सुरू असलेले काम तात्काळ थांबवण्याची नोटीस बजावली.

Edited By- Dhanashri Naik