पुष्पा २ प्रीमियर प्रकरण: अल्लू अर्जुनला न्यायालयात हजर राहण्याचे आदेश
नेमकं काय प्रकरण आहे?
हा संपूर्ण वाद ४ डिसेंबर २०२४ रोजी सुरू झाला, जेव्हा हैदराबादच्या प्रसिद्ध संध्या थिएटरमध्ये 'पुष्पा २: द रूल' या चित्रपटाचा भव्य प्रीमियर आणि विशेष स्क्रीनिंग आयोजित करण्यात आला होता. या प्रीमियरला अल्लू अर्जुन उपस्थित राहणार होता. आपल्या आवडत्या स्टारची एक झलक पाहण्याच्या उत्सुकतेने हजारो चाहते थिएटरबाहेर जमले होते. अल्लू अर्जुन आपल्या कुटुंबासह आणि सुरक्षा रक्षकांसह येताच, गर्दीने एकच जल्लोष केला.
जेव्हा अल्लू अर्जुनने आपल्या गाडीच्या सनरूफमधून चाहत्यांना अभिवादन केले, तेव्हा परिस्थिती चिघळली. त्यानंतर झालेल्या गोंधळ आणि गैरव्यवस्थापनामुळे मोठी चेंगराचेंगरी झाली. रेवती नावाच्या ३५ वर्षीय महिला चाहत्याचा गुदमरून दुर्दैवाने मृत्यू झाला, तर तिचा आठ वर्षांचा मुलगा, श्री तेजा, गंभीर जखमी झाला.
घटनेनंतर, पीडितेच्या कुटुंबीयांच्या तक्रारीच्या आधारे चिक्कडपल्ली पोलीस ठाण्यात भारतीय दंड संहितेच्या (IPC) गंभीर कलमांखाली गुन्हा दाखल करण्यात आला. सखोल तपासानंतर, पोलिसांनी न्यायालयात १०० पानांचे सविस्तर आरोपपत्र दाखल केले, ज्यात २३ जणांना आरोपी म्हणून नाव देण्यात आले आहे. पुरेशा सुरक्षा व्यवस्थेशिवाय सार्वजनिक ठिकाणी जमावाला भडकवल्याप्रकरणी अल्लू अर्जुनला ११वा आरोपी म्हणून नाव देण्यात आले आहे.
अटकेपासून जामिनापर्यंतचा प्रवास
या प्रकरणात तातडीने कारवाई करत पोलिसांनी १३ डिसेंबर २०२४ रोजी अल्लू अर्जुनला अटक केली. मात्र, दुसऱ्याच दिवशी तेलंगणा उच्च न्यायालयाने त्याला अंतरिम जामीन मंजूर केला, ज्याचे नंतर नियमित जामिनात रूपांतर करण्यात आले. त्यानंतर, ३१ डिसेंबर रोजी चिक्कडपल्ली पोलिसांनी पोलीस ठाण्यात अभिनेत्याची सुमारे तीन तास कसून चौकशी केली.
तुरुंगातून सुटल्यानंतर अल्लू अर्जुनने एका पत्रकार परिषदेत या घटनेबद्दल तीव्र दुःख व्यक्त केले. त्याने स्पष्ट केले की, या घटनेत त्याचा थेट सहभाग नव्हता, कारण तो आधीच आत गेला होता आणि ही घटना थिएटरच्या आवाराबाहेर घडली. तथापि, माणुसकीच्या नात्याने, अल्लू अर्जुनचे वडील आणि प्रसिद्ध निर्माते अल्लू अरविंद यांनी पीडित कुटुंबाला २ कोटी रुपयांची आर्थिक मदत जाहीर केली.
Edited By - Priya Dixit
