PBKS vs GT : पंजाबने गुजरातचा तीन गडी राखून पराभव केला

शशांक सिंगने 29 चेंडूत सहा चौकार आणि चार षटकारांच्या मदतीने 61 धावांची नाबाद खेळी करत पंजाब किंग्जला गुजरात टायटन्सवर विजय मिळवून दिला. आयपीएलच्या चालू मोसमातील चार सामन्यांमधला पंजाबचा हा दुसरा विजय आहे. पंजाबला याआधीच्या दोन सामन्यांमध्ये पराभवाला सामोरे जावे लागले होते, मात्र संघाने प्रतिकूल परिस्थितीवर मात करत गुजरातचा घरच्या मैदानावर पराभव केला.

गुजरातने प्रथम फलंदाजी करताना कर्णधार शुभमन गिलच्या 48 चेंडूंत सहा चौकार आणि चार षटकारांच्या जोरावर केलेल्या नाबाद 89 धावांच्या जोरावर चार गडी गमावून 199 धावा केल्या. लक्ष्याचा पाठलाग करताना पंजाब किंग्जची सुरुवात चांगली झाली नाही, पण इम्पॅक्ट सब म्हणून मैदानात उतरलेल्या शशांक आणि आशुतोष शर्माने संघाला सामन्यात परत आणले. या दोन फलंदाजांच्या जोरावर पंजाबने एक चेंडू बाकी असताना सात विकेट्सवर 200 धावा करून विजयाची नोंद केली. पंजाबने या मोसमातील सर्वात मोठे लक्ष्य यशस्वीपणे गाठले. 

किंग्जचा कर्णधार शिखर धवनने या सामन्यात नाणेफेक जिंकून प्रथम गोलंदाजी करण्याचा निर्णय घेतला.

पंजाब किंग्जचा फलंदाज शशांक सिंगने शानदार फलंदाजी करत गुजरात टायटन्सविरुद्ध अर्धशतक झळकावले. शशांकच्या आयपीएल कारकिर्दीतील हे पहिलेच अर्धशतक आहे.

गुजरात टायटन्सचा कर्णधार शुभमन गिलने पंजाब किंग्जविरुद्ध चमकदार कामगिरी करत आयपीएलच्या या मोसमातील पहिले अर्धशतक झळकावले. गिलच्या कारकिर्दीतील हे 19वे अर्धशतक आहे. गिलने 2019 पासून पंजाबविरुद्ध नऊ डावांत सहा अर्धशतके झळकावली आहेत. 

Edited By- Priya Dixit