अंडर 19 आशिया चषकासाठी टीम इंडियाचा संघ जाहीर, सेहवाग-द्रविडच्या मुलांनाही संघात स्थान

BCCI ने मस्कत, ओमान येथे 5 नोव्हेंबर ते 14 नोव्हेंबर दरम्यान खेळल्या जाणाऱ्या आशिया कप अंडर-19 स्पर्धेसाठी टीम इंडियाचा संघ जाहीर केला आहे. भारतीय अंडर-19 संघाच्या कर्णधारपदाची जबाबदारी लक्ष्य रायचंदानी यांच्याकडे सोपवण्यात आली असून, संघाचे दोन माजी खेळाडू वीरेंद्र सेहवाग आणि राहुल द्रविड यांचा मुलगा आर्यवीर सेहवाग आणि अन्वय द्रविड यांनाही संघात स्थान मिळाले आहे. अशा परिस्थितीत या दोन खेळाडूंच्या कामगिरीकडे सर्वांच्या नजरा लागल्या आहेत. टीम इंडियाला 8 संघांच्या या स्पर्धेत गट-अ मध्ये स्थान मिळाले आहे, ज्यात नेपाळ, पाकिस्तान आणि यूएईच्या अंडर-19 संघांचा समावेश आहे.

50 षटकांच्या फॉर्मेटमध्ये खेळल्या जाणाऱ्या अंडर-19 आशिया चषक स्पर्धेत भारतीय अंडर-19 संघ 6 नोव्हेंबर रोजी नेपाळ संघाविरुद्ध ग्रुप-ए मध्ये पहिला सामना खेळेल. यानंतर, दुसऱ्या सामन्यात टीम इंडियाचा सामना दिवाळीच्या दिवशी 8 नोव्हेंबर रोजी पाकिस्तान अंडर-19 संघाशी होणार असून सर्व चाहते या सामन्याची आतुरतेने वाट पाहत आहे. ग्रुप स्टेजच्या शेवटच्या सामन्यात भारतीय संघाला १० नोव्हेंबर रोजी यूएई संघाविरुद्ध खेळायचे आहे. ग्रुप स्टेजमध्ये टॉप-2 स्थान मिळवणारे संघ थेट उपांत्य फेरीसाठी त्यांचे स्थान निश्चित करतील, ज्यामध्ये दोन्ही उपांत्य फेरीचे सामने 12 नोव्हेंबर रोजी आणि अंतिम सामना 14 नोव्हेंबर रोजी खेळवला जाईल. सर्व सामने भारतीय वेळेनुसार सकाळी 10.30 वाजता सुरू होतील.

अंडर-19 आशिया कपसाठी भारतीय संघ

लक्ष्य रायचंदानी (कर्णधार), आर्यवीर सेहवाग, व्ही.के. विनीत, यशवर्धन सिंग चौहान (उपकर्णधार), कुशाग्र ओझा, अर्जुन राजपूत, मनाल चौहान, अन्वय द्रविड (यष्टीरक्षक), रजत बघेल (यष्टीरक्षक), व्ही. यशवीर, आर्यन सवासानी, मोहित उलवा, काव्या पटेल, शविन विनोद, इशान एस.