मुंबई ते पुणे सुपर फास्ट : याच महिन्यात मुंबई-पुणे हायपरलूपचे होणार भूमिपूजन

मुंबईहून पुणे गाठण्यासाठी एक्स्प्रेस वे वरून साडेतीन तासांचा वेळ लागतो. तर मुंबई-पुणे हायपरलूप ट्रेन (किंवा पॉड)ने केवळ २३ मिनिटांत हे अंतर पूर्ण करणार आहे. मुंबई व पुणे या दोन महानगरांना हायपरलूप तंत्रज्ञानाद्वारे जोडणारा हा अत्याधुनिक वाहतूक प्रकल्प आहे. कुर्ला बीकेसी ते वाकडदरम्यान ११७.५० किमी अंतरावर हा प्रकल्प कार्यान्वयीत होणार आहे. जवळपास ७० हजार कोटी रुपयांची थेट परकीय गुंतवणूक यामध्ये होणार आहे. एवढ्या मोठ्या प्रमाणात अशी गुंतवणूक होणारा हा देशातील पहिलाच प्रकल्प असणार आहे. सोबतच अतिवेगवान प्रवास साध्य करणारा हा जगातील पहिलाच हायपरलूप प्रकल्प असणार आहे. या प्रकल्पाच्या पहिल्या टप्प्यात जवळपास पाच हजार कोटी रुपये खर्च होणार असून या टप्प्यात ११.८० किमी लांबीचा पथदर्शी प्रकल्प बांधण्यात येणार आहेत. यासाठी दोन ते अडीच वर्षांचा कालावधी लागेल. तर संपूर्ण प्रकल्पासाठी सहा ते सात वर्षांचा कालावधी लागणार आहे.