महाराष्ट्रात एफडीएची पाच जिल्ह्यांत धाड, भेसळयुक्त दुधाच्या रॅकेटचा पर्दाफाश;१३ जणांना अटक
मिळालेल्या माहितीनुसार गुप्त माहितीच्या आधारे एफडीएने पुणे ग्रामीण पोलिसांच्या सहकार्याने पाच जिल्ह्यांत संयुक्त कारवाई करून दुधातील भेसळीच्या संघटित नेटवर्कचा पर्दाफाश केला. या कारवाईदरम्यान, अंदाजे १.४८ कोटी रुपयांचा माल जप्त करण्याबरोबरच २०,००० लिटर संशयित दूध घटनास्थळीच नष्ट करण्यात आले.
याव्यतिरिक्त, विविध कलमांखाली २६ जणांवर गुन्हे दाखल करण्यात आले आहे आणि संपूर्ण भेसळ नेटवर्कविरोधात कारवाई सुरू करण्यात आली आहे. पाच खाद्य व्यवसाय परवाने निलंबित करण्यात आले आहे आणि चार आस्थापनांना बंद करण्याचे आदेश देण्यात आले आहे. एफडीएच्या तपासात असे उघड झाले की, स्किम्ड मिल्क पावडर, व्हे/डेअरी परमीएट पावडर, इमल्सिफायर, डिटर्जंट, शॅम्पू आणि पाम तेल यांसारख्या घटकांचा वापर करून कृत्रिम दूध तयार केले जात होते आणि नंतर ते नैसर्गिक दुधात मिसळून बाजारात विकले जात होते. या तपासात या नेटवर्कची पुरवठा साखळीही उघड झाली.
पुणे, अहिल्यानगर, सोलापूर, जालना आणि ठाणे जिल्ह्यांमध्ये ४ आणि ५ जुलै रोजी एकाच वेळी छापे टाकण्यात आले. या कारवाईदरम्यान, दूध संकलन केंद्रे, शीतकरण केंद्रे, पॅकिंग युनिट्स आणि भेसळयुक्त साहित्य असलेल्या साठवणूक सुविधांची झडती घेण्यात आली. या प्रकरणी २६ आरोपींविरुद्ध गुन्हा दाखल करण्यात आला आहे. आतापर्यंत १३ आरोपींना अटक करून न्यायालयात हजर करण्यात आले असून, त्यांना पाच दिवसांची पोलीस कोठडी सुनावण्यात आली आहे.
Edited By- Dhanashri Naik
