शुक्रवार, 9 डिसेंबर 2022
  1. मराठी बातम्या
  2. महाराष्ट्र न्यूज
  3. बीबीसी मराठी बातम्या
Written By
Last Modified शनिवार, 6 मार्च 2021 (17:05 IST)

IndvsEng: टीम इंडियाचा इंग्लंडवर दणदणीत विजय; वर्ल्ड चॅम्पियनशिपच्या फायनलमध्ये

सांघिक प्रदर्शनाच्या बळावर भारतीय संघाने अहमदाबाद इथे सुरू असलेलया चौथ्या टेस्टमध्ये इंग्लंडवर एक डाव आणि 25 रन्सने विजय मिळवला. या विजयासह भारतीय संघाने ही मालिका 3-1 अशी जिंकली.
 
रवीचंद्रन अश्विन आणि अक्षर पटेल यांच्या शानदार फिरकीच्या बळावर भारताने अहमदाबाद इथल्या चौथ्या टेस्टमध्ये इंग्लंडचा दुसरा डाव 135 रन्समध्ये गुंडाळत एक डाव आणि 25 रन्सने दणदणीत विजय मिळवला.
 
या विजयासह टीम इंडियाने चार सामन्यांची मालिका 3-1 अशी जिंकली. या विजयासह भारतीय संघाने जून महिन्यात होणाऱ्या वर्ल्ड चॅम्पियनशिपच्या फायनलमध्ये स्थान पटकावलं. भारताचा मुकाबला न्यूझीलंडशी होणार आहे.
 
इंग्लंडने नाणेफेक जिंकून प्रथम बॅटिंगचा निर्णय घेतला. मात्र भारतीय बॉलर्सच्या शिस्तबद्ध माऱ्यासमोर इंग्लंडचा डाव 205 रन्समध्येच आटोपला.
 
शतकी खेळी तसंच अफलातून विकेटकीपिंगसाठी ऋषभ पंतला मॅन ऑफ द मॅच पुरस्काराने गौरवण्यात आलं.
 
रवींद्र जडेजाला दुखापत झाल्याने संधी मिळालेल्या अक्षर पटेलने संधीचं सोनं करत तीन टेस्टमध्ये 27 विकेट्स घेतल्या. अक्षरने या मालिकेत डावात पाच विकेट्स घेण्याची करामत चारवेळा केली.
 
32 विकेट्स आणि 189 रन्स अशा अष्टपैलू कामगिरीसाठी रवीचंद्रन अश्विनला मॅन ऑफ द सीरिज पुरस्काराने सन्मानित करण्यात आलं.
 
अष्टपैलू वॉशिंग्टन सुंदरची इंग्लंडविरुद्धच्या चौथ्या टेस्टमध्ये कारकीर्दीतलं पहिलंवहिलं शतक साकारण्याची संधी थोडक्यात हुकली. आठव्या क्रमांकावर फलंदाजीला आलेल्या वॉशिंग्टनने 96 रन्सची खेळी केली.
 
दुसऱ्या दिवशी खेळपट्टीवर आलेल्या सुंदरने ऋषभ पंतला साथ देत सातव्या विकेटसाठी 113 रन्सची भागीदारी केली. ऋषभ बाद झाल्यानतंर सुंदरने सूत्रं हाती घेतली.
 
सुंदरने अक्षर पटेलच्या साथीने आठव्या विकेटसाठी शतकी भागीदारी साकारली. वॉशिंग्टन 96 वर असताना अक्षर पटेल रनआऊट झाला. इशांत शर्माला बेन स्टोक्सने एलबीडब्ल्यू केलं तर मोहम्मद सिराज त्रिफळाचीत झाला.
 
भारतासाठी टेस्ट क्रिकेटमध्ये आठव्या क्रमांकावर बॅटिंगला येत शतक साकारण्याची किमया रवीचंद्रन अश्विन, महेंद्रसिंग धोनी, हरभजन सिंग, कपिल देव, वृद्धिमान साहा, अजय रात्रा, अनिल कुंबळे, अजित आगरकर, हार्दिक पंड्या, सय्यद किरमाणी, इरफान पठाण यांनी केली आहे.
 
भारतीय संघाचा डाव 365 रन्समध्येच आटोपला. ऋषभ पंतने 13 चौकार आणि 2 षटकारांसह 101 रन्सची खेळी केली. वॉशिंग्टनने 10 चौकार आणि एका षटकारासह 96 रन्सची खेळी केली.