शंकराची भूमिका साकारणारा मोहित बॉलिवूडमध्ये
‘देवों के देव महादेव’या मालिकेतून शंकराची भूमिका साकारणारा अभिनेता मोहित रैना बॉलिवूड पदार्पणासाठी तयारी करत असून 'उरी' चित्रपटातून मोहित प्रेक्षकांच्या भेटीला येणार आहे. सध्याच्या घडीला मोहितने त्याच्या सर्व मालिकांचं चित्रीकरण पूर्ण केलं असून, आता तो पूर्णपणे या चित्रपटावर म्हणजेच बॉलिवूड पदार्पणावर लक्ष केंद्रीत करत आहे. मोहित सध्या ‘सरफरोश: सारागढी १८९७’,या मालिकेत काम करत आहे. ‘उरी’या चित्रपटातून तो एका सैन्यदल अधिकाऱ्याच्या भूमिकेत झळकणार आहे. अभिनेत्री आणि मोहितची तथाकथित प्रेयसी मौनी रॉय हीसुद्धा खिलाडी कुमारच्या ‘गोल्ड’या चित्रपटातून बी टाऊनमध्ये पदार्पण करणार आहे.
‘भारतीय सैन्यदल सेवेत रुजू होण्याचं माझं स्वप्न होतं. ते स्वप्न काही कारणाने साकार होऊ शकलं नाही. पण, मला जेव्हा जेव्हा सैन्यदल अधिकाऱ्याची भूमिका साकारण्याची संधी मिळते तेव्हा तेव्हा मी त्या संधीचं सोनं करतो. स्वत:लाच आव्हान देणाऱ्या भूमिका साकारणं मला आवडतं’,असं मोहितने सांगीतल आहे.
