पुणे गँगवॉरचा नवा अध्याय? बंडू आंदेकरने जेलच्या भिंतीआडून रचला वनराजच्या हत्येचा बदला; टोळीतील ६ जणांना अटक
पुण्यातील कुख्यात आंदेकर आणि म्हस्के टोळीमधील जुना वाद आणि माजी नगरसेवक वनराज आंदेकर यांच्या हत्येचा बदल्याचा रक्तरंजित अंक पुन्हा एकदा समोर आला आहे. पुणे-सातारा रस्त्यावरील धनकवडी येथील बालाजीनगर परिसरात रिक्षाचालक अक्षय ऊर्फ बाळा बापू म्हस्के (वय २६) याच्यावर भरदिवसा झालेल्या गोळीबार आणि कोयता हल्ल्याप्रकरणी पुणे पोलिसांनी मोठी कारवाई केली आहे. पोलिसांनी आंदेकर टोळीशी संबंधित ६ संशयितांना अटक केली आहे.
पोलिसांच्या प्राथमिक तपासानुसार, या संपूर्ण हल्ल्याचा कट सध्या येरवडा कारागृहात असलेला आंदेकर टोळीचा प्रमुख सूर्यकांत ऊर्फ बंडू आंदेकर याने जेलच्या भिंतीआड रचल्याचा दाट संशय आहे.
काय आहे पार्श्वभूमी आणि घटना?
१ सप्टेंबर २०२४ रोजी नाना पेठेतील डोके तालीम चौकात माजी नगरसेवक वनराज आंदेकर (बंडू आंदेकर यांचा मुलगा) यांची कौटुंबिक आणि मालमत्तेच्या वादातून गोळ्या झाडून हत्या करण्यात आली होती. या हायप्रोफाईल खून प्रकरणात आकाश म्हस्के हा मुख्य आरोपींपैकी एक आहे, ज्याने या हत्येसाठी उत्तर प्रदेश आणि मध्य प्रदेशातून पिस्तूल पुरवल्याचा आरोप आहे. तो सध्या मोक्का (MCOCA) अंतर्गत जेलमध्ये आहे.
याच हत्येचा सूड घेण्यासाठी आंदेकर टोळीने बुधवारी (२० मे) सकाळी साडे नऊच्या सुमारास आकाश म्हस्केचा धाकटा भाऊ अक्षय म्हस्के याला लक्ष्य केले. अक्षय हा रिक्षाचालक असून त्याचा कोणत्याही गुन्हेगारी पार्श्वभूमीशी थेट संबंध नव्हता. तो रिक्षा घेऊन जात असताना दोन दुचाकीवरून आलेल्या ५ ते ६ हल्लेखोरांनी त्याच्यावर अतिशय जवळून ४ राऊंड फायर केले. यातील एक गोळी त्याच्या मांडीला लागली तर दुसरी छातीला चाटून गेली. तो खाली पडल्यानंतर हल्लेखोरांनी त्याच्या डोक्यावर आणि चेहऱ्यावर कोयत्याने गंभीर वार केले. अक्षयवर सध्या खासगी रुग्णालयात उपचार सुरू आहेत.
पोलिसांची नवी डोकेदुखी आणि टोळीची चलाख युक्ती
पुणे पोलीस आयुक्त अमितेश कुमार आणि अप्पर पोलीस आयुक्त राजेश बन्सोडे यांनी दिलेल्या माहितीनुसार, आंदेकर टोळी आता सूड घेण्यासाठी एका नवीन रचनेचा वापर करत आहे. पोलिसांच्या रेकॉर्डवर नसलेल्या आणि अल्पवयीन मुलांचा किंवा नवीन गुन्हेगारांचा वापर या गुन्ह्यांसाठी केला जात आहे, जेणेकरून पोलिसांना संशय येऊ नये.
या घटनेमुळे पुणे शहरातील गँगवॉर पुन्हा एकदा उफाळून आले असून नागरिकांमध्ये कमालीचे भीतीचे वातावरण आहे. पोलिसांनी सीसीटीव्ही फुटेजच्या आधारे ६ जणांना ताब्यात घेतले असून जेलमध्ये असलेल्या बंडू आंदेकर आणि कृष्णा आंदेकर यांच्या अडचणी आता या नव्या कटामुळे वाढण्याची शक्यता आहे.
