बेन स्टोक्सची वनडे क्रिकेटमधून निवृत्ती, जाणून घ्या वयाच्या 31 व्या वर्षी का घेतला हा निर्णय

इंग्लंडचा स्टार अष्टपैलू खेळाडू बेन स्टोक्सने एकदिवसीय क्रिकेटमधून निवृत्ती घेतली आहे. स्टोक्स सध्या इंग्लंडच्या कसोटी संघाचा कर्णधार आहे. तो टी-20 आणि कसोटी क्रिकेट खेळत राहणार आहे. बेन स्टोक्स मंगळवारी (19 जुलै) शेवटचा सामना त्याच्या घरच्या मैदान डरहमवर खेळणार आहे. इंग्लंडचा संघ हा सामना दक्षिण आफ्रिकेविरुद्ध खेळणार आहे. स्टोक्सने इंग्लंडसाठी 104 एकदिवसीय सामन्यांमध्ये भाग घेतला आहे. 2019 च्या एकदिवसीय विश्वचषक फायनलमध्ये त्याला सामनावीर म्हणूनही गौरविण्यात आले.

स्टोक्सने सोशल मीडियावर निवृत्तीची घोषणा केली. त्याने इंस्टाग्रामवर लिहिले, “मी मंगळवारी डरहममध्ये इंग्लंडसाठी वनडे क्रिकेटमध्ये माझा शेवटचा सामना खेळणार आहे. मी या फॉरमॅटमधून निवृत्ती घेण्याचा निर्णय घेतला आहे. माझ्यासाठी हा अत्यंत कठीण निर्णय होता. माझ्या सहकाऱ्यांसोबत इंग्लंडकडून खेळताना मी प्रत्येक मिनिटाचा आनंद लुटला आहे. हा प्रवास माझ्यासाठी खूप छान होता. आता या फॉरमॅटमध्ये त्याच्या संघासाठी 100% देऊ शकत नाही. मी आता तिन्ही फॉरमॅटमध्ये चांगले क्रिकेट खेळू शकणार नाही, त्यामुळे मी हा निर्णय घेतला आहे. 

इंग्लंडला पहिला एकदिवसीय विश्वचषक जिंकण्याचे श्रेय

बेन स्टोक्सने 2019 मध्ये इंग्लंडला एकदिवसीय विश्वचषक विजेता बनवले. स्टोक्सने संपूर्ण स्पर्धेत चांगली फलंदाजी करत 66.42 च्या सरासरीने 465 धावा केल्या. अंतिम फेरीतही स्टोक्सने 84 धावांची धडाकेबाज खेळी खेळताना संघाच्या आशा जिवंत ठेवल्या. त्याच्या खेळीमुळे इंग्लंडला प्रथमच विश्वचषक जिंकण्यात यश आले. याशिवाय स्टोक्सने या स्पर्धेत 7 विकेट्सही घेतल्या.

बेन स्टोक्स एकदिवसीय कारकिर्दीत

स्टोक्सने वयाच्या 20 व्या वर्षी 2011 मध्ये आयर्लंडविरुद्ध इंग्लंडकडून वनडे क्रिकेटमध्ये पदार्पण केले. 31 वर्षीय स्टोक्सने 11 वर्षांच्या एकदिवसीय कारकिर्दीत केवळ 104 सामने खेळले. एकदिवसीय क्रिकेटमध्ये त्याने 40 च्या सरासरीने 2919 धावा केल्या आहेत. त्याच्या नावावर तीन शतके आणि 21 अर्धशतके आहेत. त्याचबरोबर या वेगवान गोलंदाजाने 74 विकेट्सही घेतल्या आहेत.