तुम्हाला माहित आहे का? घरी कुंडीत किंवा बागेत कोथिंबीर उगवणे अतिशय सोपे आणि फायदेशीर आहे. घरची कोथिंबीर अधिक सुगंधी आणि रासायनिक खतांपासून मुक्त असते. याकरिता आज आपण घरी कोथिंबीर लागवड करण्यासाठी सोपी पद्धत जाणून घेणार आहोत.
तयारी
धणे: स्वयंपाकात वापरले जाणारे अखंड धणे (बियाणे म्हणून).
कुंडी: रुंद आणि कमीत कमी ५-६ इंच खोल असलेली कुंडी किंवा प्लास्टिक ट्रे.
माती: बागेतील माती, थोडे शेणखत किंवा कोकोपीट यांचे मिश्रण.
लागवडीची पद्धत
बियाणे तयार करा: अखंड धणे घेऊन ते हाताने किंवा लाटण्याने हलके रगडूण त्याचे दोन भाग (डाळ) करा. लक्षात ठेवा, धणे फक्त फुटले पाहिजेत, त्याचा कूट होऊ देऊ नका.
बिया भिजवणे: धणे लवकर रुजण्यासाठी ते लागवडीपूर्वी रात्रभर किंवा ५-६ तास कोमट पाण्यात भिजवून ठेवा. यामुळे मोड लवकर येतात.
माती तयार करा: कुंडीत माती भरून ती थोडी भुसभुशीत करून घ्या. त्यात थोडे पाणी शिंपडून माती ओली करा.
पेरणी: तयार केलेले धणे मातीवर विरळ पसरवा. त्यावर अर्धा इंच मातीचा थर टाकून बिया झाकून टाका.
पाणी देणे: सुरुवातीला हाताने किंवा स्प्रे बॉटलने हलके पाणी द्या. माती नेहमी ओलसर राहील याची काळजी घ्या, पण जास्त पाणी साचू देऊ नका.
जोपासना
सूर्यप्रकाश: कोथिंबिरीला दिवसातून किमान ३ ते ४ तास कोवळा सूर्यप्रकाश मिळेल अशा ठिकाणी कुंडी ठेवा. दुपारी खूप कडक ऊन असेल तर कुंडी सावलीत सरकवा.
पाणी देण्याची वेळ: मातीचा वरचा थर कोरडा दिसला की पाणी द्या. शक्यतो सकाळी किंवा संध्याकाळी पाणी द्यावे.
खत: लागवडीनंतर १०-१५ दिवसांनी थोडेसे किचन वेस्ट कंपोस्ट किंवा पातळ शेणखत दिल्यास कोथिंबीर जोमाने वाढते.
काढणी
साधारण ३० ते ४० दिवसांत कोथिंबीर वापरण्यासाठी तयार होते.
कोथिंबीर काढताना ती मुळासकट न उपटता, कात्रीने वरून कापून घ्यावी. यामुळे खालून पुन्हा नवीन पालवी फुटते आणि तुम्हाला पुन्हा कोथिंबीर मिळते.
खास टिप-
जर तुम्हाला खूप गडद हिरवी कोथिंबीर हवी असेल, तर मातीत थोडे वाळलेले चहाचे दाणे (वापरलेली आणि धुवून वाळवलेली चहापत्ती) मिसळा. यामुळे मातीला नायट्रोजन मिळते.
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत नाही. अधिक माहितीसाठी संबंधित तज्ज्ञांचा सल्ला घ्यावा.
Edited By- Dhanashri Naik
