9 कोटी रुपये किमतीचे प्रतिबंधित चीनी वॉकी-टॉकी जप्त, डीआरआयची मोठी कारवाई, दोघांना अटक
एका मोठ्या कारवाईत, अन्वेषण संचालनालयाने (डीआरआय) नवी मुंबई बंदरातून प्रतिबंधित इलेक्ट्रॉनिक वस्तूंचा मोठा साठा जप्त केला आहे. जप्त केलेल्या वस्तूंमध्ये राष्ट्रीय सुरक्षेसाठी संभाव्य धोकादायक असलेल्या चिनी वॉकी-टॉकींच्या साठ्याचा समावेश होता
एका मोठ्या कारवाईत, महसूल गुप्तचर संचालनालयाने (डीआरआय) नवी मुंबईच्या न्हावा शेवा बंदरातून एकूण 9.25 कोटी रुपये किमतीचे 11,060प्रतिबंधित वॉकी-टॉकी सेट आणि सेकंड-हँड हार्ड डिस्क ड्राइव्ह (एचडीडी) जप्त केले आहेत. शनिवारी जारी केलेल्या अधिकृत निवेदनानुसार, मुंबईस्थित दोन कंपन्यांचे मालक असलेल्या एका वडील-मुलाच्या जोडीला सीमाशुल्क कायद्यांतर्गत अटक करण्यात आली आहे. या वडील-मुलाच्या जोडीने परवानगीशिवाय या वस्तू आयात केल्याचा आरोप आहे.
डीआरआय अधिकाऱ्यांच्या एका पथकाने ही कारवाई केली. या छाप्यात, 2.5 कोटी रुपये किमतीचे बाओफेंग बीएफ-888एस वॉकी-टॉकी आणि 6.75 कोटी रुपये किमतीचे सेकंड-हँड हार्ड डिस्क ड्राइव्ह (ई-कचरा मानले जाणारे) जप्त करण्यात आले. अधिकाऱ्यांनी सांगितले की, हा अवैध माल २१ कोटी रुपये किमतीच्या इतर इलेक्ट्रॉनिक उत्पादनांमध्ये लपवून ठेवण्यात आला होता. चीनमधून आठ कंटेनरमधून पाठवण्यात आलेला 30.25 कोटी रुपये किमतीचा संपूर्ण माल, चुकीची माहिती दिल्याचा आरोप ठेवून जप्त करण्यात आला.
हे चिनी वॉकी-टॉकी राष्ट्रीय सुरक्षेसाठी धोकादायक आहेत.
बाओफेंग बीएफ-888एस (Baofeng BF-888S) वॉकी-टॉकींना दूरसंचार विभागाने काळ्या यादीत टाकले आहे, कारण ते निर्धारित फ्रिक्वेन्सीच्या बाहेर काम करतात आणि त्यांचा वापर अनधिकृत संवादासाठी केला जाऊ शकतो, ज्यामुळे राष्ट्रीय सुरक्षेला धोका निर्माण होतो. या उपकरणांसाठी एका विशिष्ट परवान्याची आवश्यकता असते. म्हणूनच एवढ्या मोठ्या संख्येने हे वॉकी-टॉकी जप्त होणे ही चिंतेची बाब आहे. शिवाय, परकीय व्यापार महासंचालनालयाच्या परवानगीशिवाय सेकंड-हँड हार्ड डिस्क ड्राइव्हची आयात करता येत नाही.
Edited By - Priya Dixit
