मुंबईत परदेशी तरुणीचा विनयभंग; पोलिसांनी २४ तासांच्या आत आरोपीला शोधून केली अटक
मुंबईत पाली हिलहून परतणाऱ्या एका फ्रेंच तरुणीचा विनयभंग झाला; मुंबई पोलिसांनी २४ तासांच्या आत धारावीच्या एका पुरूषाला अटक केली.
मिळालेल्या माहितीनुसार मुंबईतील वांद्रे वेस्ट रोडवर मध्यरात्रीनंतर एका २७ वर्षीय फ्रेंच महिलेची स्कूटर स्वाराने छेडछाड केली. येथील फ्रेंच वाणिज्य दूतावासात काही काळ काम करणारी ही महिला सुमारे एक किलोमीटर अंतरावर असलेल्या पाली हिल येथील एका मैत्रिणीला भेटून घरी परतत असताना स्कूटर स्वाराने तिचा पाठलाग सुरू केला. घटनेची माहिती मिळताच खार पोलिसांनी कारवाई केली आणि प्रकरणाचे गांभीर्य लक्षात घेऊन शनिवारी रात्री २४ तासांच्या आत आरोपीला धारावी येथून अटक केली. २५ वर्षीय आरोपीचे नाव सुनील वाघेला आहे. वाघेला हा धारावीचा रहिवासी आहे आणि झोपडपट्टीत भंगाराचा व्यवसाय करतो.
आरोपीला रविवारी वांद्रे हॉलिडे कोर्टात हजर करण्यात आले आणि सोमवारपर्यंत पोलिस कोठडी सुनावण्यात आली. पोलिसांनी घटनास्थळावरून गुन्ह्यात वापरलेली स्कूटर जप्त केली आहे. आरोपीविरुद्ध भारतीय दंड संहितेच्या कलम ७४ (महिलेचा विनयभंग करण्याच्या उद्देशाने तिच्यावर हल्ला किंवा गुन्हेगारी बळजबरी) अंतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना ८ नोव्हेंबरच्या मध्यरात्री घडली. पीडित महिला वांद्रे (पश्चिम) येथे भाड्याच्या घरात राहत होती. ७ नोव्हेंबर रोजी ती पाली हिल येथे तिच्या मैत्रिणीला भेटायला गेली होती आणि ८ नोव्हेंबर रोजी घरी परतत होती. खार पोलिस ठाण्याच्या हद्दीत शेर्ली राजन रोडवरील तिच्या घरी परतत असताना रात्री १२:२५ वाजता आरोपीने तिचा विनयभंग केला केला. पीडितेने दूतावासाला माहिती दिली, त्यानंतर पोलिसांनी १४ नोव्हेंबर रोजी गुन्हा दाखल केला.
मुंबई पोलिसांच्या झोन ९ चे डीसीपी दीक्षित गेडाम यांनी एसीपी आदिकराव पोळ, वरिष्ठ पीआय संजीव धुमल, पीआय वैभव काटकर, एपीआय भरत सातपुते आणि पीएसआय हनुमंत कुंभारे यांच्या नेतृत्वाखाली एक विशेष पथक तयार केले. पथकाने वांद्रे येथील फ्लोरियन ह्युरेल हेअर कॉउचर अँड स्पा येथील ५० हून अधिक सीसीटीव्ही रेकॉर्डिंग तपासले. काही सीसीटीव्ही फुटेजमध्ये संशयित स्कूटरवर असल्याचे दिसून आले आणि स्कूटरच्या नोंदणी क्रमांकावरून आरोपीचा शोध घेण्यात आला. त्यानंतर, पोलिसांनी धारावी परिसरात सापळा रचला आणि वाघेलाच्या हालचालींचा मागोवा घेत शनिवारी रात्री उशिरा त्याला अटक केली.
Edited By- Dhanashri Naik
