तैवानहून उडत मुंबईला आला कबूतर, 'चिनी गुप्तहेर' समजून पोलिसांनी पकडले, 8 महिन्यांनी सोडले

मुंबई पोलिसांनी गेल्या वर्षी पकडलेल्या संशयास्पद कबुतराला सोडून दिले आहे. कबुतराला गुप्तहेर म्हणून प्रशिक्षण देण्यात आले होते आणि चिनी लोक हेरगिरीसाठी त्याचा वापर करत असल्याचा संशय पोलिसांना होता. मात्र तपासात हे सिद्ध न झाल्याने आठ महिन्यांनी कबुतराची सुटका करण्यात आली.

मुंबई पोलीस अधिकाऱ्याने सांगितले की, आरसीएफ (राष्ट्रीय केमिकल्स अँड फर्टिलायझर) पोलिसांनी गेल्या वर्षी मे महिन्यात चेंबूर परिसरातून कबुतराला पकडले होते. तेव्हापासून कबुतराला पशुवैद्यकीय रुग्णालयात ठेवण्यात आले होते.

आरसीएफ पोलिस स्टेशनच्या अधिकाऱ्याने दिलेल्या माहितीनुसार, परळ परिसरात असलेल्या बाई सक्करबाई दिनशॉ पेटिट ॲनिमल हॉस्पिटलने सोमवारी पक्षी सोडण्याची परवानगी मागितली होती. पोलिसांची परवानगी मिळाल्यानंतर मंगळवारी या कबुतराला सोडण्यात आले.

पोलिसांना तो गुप्तहेर का वाटला?

कबुतराला पकडल्यावर त्याच्या पायात दोन कड्या बांधलेल्या होत्या. एक तांब्याची आणि दुसरी ॲल्युमिनियमची होती. त्याच्या दोन्ही पंखाखाली चिनी लिपीत काहीतरी लिहिलेले होते. त्यामुळे पोलिसांनी कबुतर हा हेरगिरीसाठी वापरला जाणारा पक्षी मानला. त्यानंतर आरसीएफ पोलिसांनी गुन्हा दाखल करून तपास सुरू केला.

हेरगिरीचा आरोप वगळला

संशयित कबूतर तैवानमध्ये 'रेसिंग'मध्ये भाग घेत असे आणि अशाच एका कार्यक्रमादरम्यान ते उडून भारतात आल्याचे पोलिस तपासात उघड झाले आहे. यानंतर पोलिसांनी हेरगिरीचा आरोप मागे घेतला. अधिकाऱ्याने सांगितले की, पोलिसांकडून मंजुरी मिळाल्यानंतर रुग्णालयाने 30 जानेवारी रोजी कबुतराला सोडले.