शरद पवार गट महायुतीत सामील होण्याची चर्चा तीव्र, विजय वडेट्टीवारांचा पलटवार
मुंबईतील एका पंचतारांकित हॉटेलमध्ये शरद पवार गटाचे नेते जयंत पाटील आणि भाजपचे राष्ट्रीय नेते विनोद तावडे यांची गुप्त बैठक झाल्याची माहिती समोर आली आहे. या बैठकीत शरद पवार गट महायुतीसोबत सत्तेत सामील झाल्यास त्यांना काय मिळेल, याबाबत सविस्तर चर्चा झाल्याचे समजते.
राजकीय वर्तुळात जोरदार चर्चा आहे की, संसदेत लोकसभा मतदारसंघांच्या पुनर्रचनेचे विधेयक मंजूर करण्यासाठी भाजपला राष्ट्रीय स्तरावर अतिरिक्त खासदारांची गरज आहे. त्यासाठी शरद पवार यांच्या राष्ट्रवादी काँग्रेस पक्षाला सोबत घेण्याच्या हालचाली सुरू असल्याचे दिसत आहे. त्यामुळे शरद पवार गट महायुतीत सामील होण्याची शक्यता वाढली आहे.
या पार्श्वभूमीवर काँग्रेस पक्षाची पहिली प्रतिक्रिया समोर आली आहे. काँग्रेस नेते विजय वडेट्टीवार म्हणाले, “शरद पवारांच्या राष्ट्रवादीला एनडीएमध्ये जाण्याच्या चर्चा पूर्णपणे सुरू आहेत. त्यांनी विचारधारा सोडून तिकडे जायचे की, विचारांची कास धरून आमच्याकडे यायचे, हे त्यांनी ठरवावे. ज्यांना आमच्याकडे यायचे असेल त्यांचे स्वागत आहे. शरद पवार मोठे नेते आहेत. त्यांच्याकडून अजून चर्चेचा कोणताही निरोप आलेला नाही. आम्ही त्यांच्यासोबत चर्चेला तयार आहोत, पण अद्याप त्यांच्याकडून काही संकेत मिळालेले नाहीत.”
या विकासांवर शरद पवार गटाकडून काय प्रतिक्रिया येईल, याकडे सर्वांचे लक्ष लागले आहे.

