सुरक्षेचा प्रश्न ऐरणीवर: एटीएसच्या कारवाईनंतर ॲप-आधारित बाईक-टॅक्सी चालकांचे बॅकग्राउंड व्हेरिफिकेशन होणार
माहीममध्ये एका रॅपिडो चालकावर एटीएसने केलेल्या कारवाईनंतर, महाराष्ट्र सरकारने कठोर भूमिका घेतली आहे. परिवहन मंत्री प्रताप सरनाईक यांनी ॲप कॅब चालकांची कडक पडताळणी आणि नवीन कायदा आणण्याचे निर्देश दिले आहे.
मुंबईत रॅपिडो, ओला आणि उबर यांसारख्या ॲप-आधारित कॅब आणि बाईक टॅक्सी सेवांच्या चालकांविरुद्ध सतत येणाऱ्या तक्रारींच्या पार्श्वभूमीवर, महाराष्ट्र सरकारने कठोर कारवाईचे संकेत दिले आहे. माहीममध्ये एका रॅपिडो चालकावर एटीएसने केलेल्या कारवाईनंतर, महाराष्ट्र सरकारने ओला, उबर आणि रॅपिडो यांसारख्या ॲप-आधारित कॅब आणि बाईक टॅक्सी सेवांविरुद्ध कठोर भूमिका घेतली आहे. परिवहन मंत्री प्रताप सरनाईक यांनी मोटार परिवहन विभागाच्या अधिकाऱ्यांना चालकांची कागदपत्रे आणि पार्श्वभूमी यांची कसून तपासणी करण्याचे स्पष्ट निर्देश दिले आहे. उल्लंघन करणाऱ्यांवर तात्काळ गुन्हा दाखल केला जाईल. सरकारने प्रवाशांची मजबूत आणि पारदर्शक सुरक्षा सुनिश्चित करण्यासाठी एक नवीन कायदाही तयार केला आहे, ज्यामुळे या कंपन्यांवर कायदेशीर कारवाई अधिक कडक होण्याची शक्यता आहे.
माहीममध्ये रॅपिडो बाईक-टॅक्सी चालवणाऱ्या एका तरुणावर दहशतवादविरोधी पथकाने केलेल्या कारवाईच्या पार्श्वभूमीवर मंगळवारी ही महत्त्वाची बैठक झाली. चालकावर त्याच्या सोशल मीडिया खात्यावर आक्षेपार्ह मजकूर पोस्ट केल्याचा आरोप आहे, ज्याचा पोलीस तपास करत आहे. तथापि, प्राथमिक तपासात पाकिस्तानमधील कोणत्याही व्यक्ती किंवा संस्थेशी त्याचा थेट संबंध असल्याचा कोणताही ठोस पुरावा समोर आलेला नाही. हे प्रकरण गांभीर्याने घेत परिवहन मंत्री सरनाईक यांनी स्पष्ट केले की, प्रवाशांच्या सुरक्षेच्या दृष्टीने, ॲप-आधारित सेवा पुरवठादारांशी संबंधित चालकांची पडताळणी आणि नियमांची अंमलबजावणी करण्यामध्ये कोणत्याही स्तरावर हलगर्जीपणा खपवून घेतला जाणार नाही.
