Tamil Nadu: तामिळनाडूच्या विरुधुनगरमध्ये फटाक्यांच्या दोन कारखान्यांमध्ये स्फोट, 14 जणांचा मृत्यू
तामिळनाडूच्या विरुधुनगर जिल्ह्यातील रंगापालयम आणि किचिन्यकनपट्टी येथे दोन वेगवेगळ्या फटाक्यांच्या कारखान्यांना लागलेल्या आगीत मंगळवारी 14 जणांचा मृत्यू झाला. या अपघातात अन्य दोघे जखमी झाल्याचेही सांगण्यात येत आहे. एका वरिष्ठ अधिकाऱ्याने दिलेल्या माहितीनुसार, स्थानिक लोकांसह पोलीस, अग्निशमन आणि बचाव सेवा कर्मचाऱ्यांनी आग विझवण्याचा आणि पीडितांना वाचवण्याचा प्रयत्न केला.
शिवकाशीच्या फटाक्यांच्या कारखान्यात अचानक स्फोट झाल्यानंतर घटनास्थळावरून सात जळालेले मृतदेह सापडले. त्याची ओळख अद्याप पटलेली नाही. मरण पावलेले लोक मजूर असू शकतात. जखमी अवस्थेत घटनास्थळावरून हलवण्यात आलेल्या इतर तीन जणांचाही नंतर मृत्यू झाला. पोलीस अधिकाऱ्याने सांगितले की, या भीषण अपघातातील मृतांची संख्या 13 झाली असून त्यात 12 महिला कर्मचाऱ्यांचा समावेश आहे.
फटाक्यांच्या कारखान्याला आग लागण्याची दुसरी घटना किचिन्यकनपट्टी गावात घडली, ज्यात एकाचा मृत्यू झाला. 35 वर्षीय वेंबू असे मृताचे नाव आहे. दोन महिला कामगारांना वाचवण्यात आले असून त्यांना उपचारासाठी श्रीविल्लीपुत्तूर सरकारी रुग्णालयात दाखल करण्यात आले आहे.
तामिळनाडूचे मुख्यमंत्री एमके स्टॅलिन यांनी या दुर्घटनेबद्दल शोक व्यक्त केला आणि या घटनेत प्राण गमावलेल्यांच्या कुटुंबियांचे सांत्वन केले. त्यांनी मृतांच्या कुटुंबीयांना प्रत्येकी 3 लाख रुपये आणि गंभीर जखमींना प्रत्येकी 1 लाख रुपयांची मदत जाहीर केली.
Edited by - Priya Dixit
