एकाच कुटुंबातील 7 जणांची विषप्राशन करून आत्महत्या
हरियाणातील पंचकुला येथून एक हृदयद्रावक घटना घडली आहे. कर्जबाजारी असलेल्या एका कुटुंबातील 7 जणांनी विष प्राशन करून आत्महत्या केली आहे. मृतांमध्ये दोन जोडपे, तीन निष्पाप मुले आणि एका वृद्धांचा समावेश होता.
मुलांचे वय सुमारे 12 ते 15 वर्षे आहे. पोलिसांना गाडीतून एक सुसाईड नोटही सापडली आहे. सुसाईड नोटमध्ये, व्यावसायिकाने कर्जामुळे त्रस्त असल्याने आत्महत्या केल्याचे लिहिले आहे. सूत्रांनी दिलेल्या माहितीनुसार, सुसाईड नोटमध्ये असेही लिहिले आहे की... माझ्यानंतर माझ्या मुलांना त्रास होऊ नये असे मला वाटते.
पोलिसांनी दिलेल्या माहितीनुसार, सोमवारी रात्री 11 वाजण्याच्या सुमारास घर क्रमांक 1204 बाहेर उभ्या असलेल्या कारमध्ये काही लोकांनी आत्महत्या केल्याची माहिती मिळाली.
पोलिसांनी घटनास्थळी पोहोचून कारमधील सहा जणांना सेक्टर-26 मधील एका खाजगी रुग्णालयात आणि एका व्यक्तीला सेक्टर-6 मधील सिव्हिल रुग्णालयात नेले. मृतांपैकी दोघांची ओळख प्रवीण मित्तल आणि त्यांचे वडील देशराज मित्तल अशी झाली आहे. कुटुंबातील इतर सदस्यांची ओळख पटलेली नाही.
पोलिस सूत्रांनी सांगितले की, प्रवीण मित्तल यांनी काही काळापूर्वी डेहराडूनमध्ये टूर अँड ट्रॅव्हल व्यवसाय सुरू केला होता, त्यात त्यांना फारसे यश मिळाले नाही. त्यात त्याचे मोठे नुकसान झाले. यामुळे कुटुंब कर्जबाजारी झाले.
प्राथमिक तपासात, कुटुंबाने दबावाखाली आत्महत्या केल्याचे पोलिसांचे मत आहे. या घटनेनंतर संपूर्ण परिसरात शोककळा पसरली असून या घटनेमुळे सर्वांनाच धक्का बसला आहे. मृतांचे मृतदेह पंचकुला सिव्हिल हॉस्पिटलच्या शवागारात शवविच्छेदनासाठी ठेवण्यात आले आहेत.
Edited By - Priya Dixit
