भाविकांनी भरलेली मिनी बस दरीत कोसळली, 11 जणांचा मृत्यू, अनेक जखमी

तामिळनाडूतील तिरुपत्तूरजवळ शनिवारी हा अपघात झाला. या अपघातात 11 जणांचा मृत्यू झाला असून अनेक जण गंभीर जखमी झाले आहेत. तामिळनाडूचे मुख्यमंत्री एमके स्टॅलिन यांनी या घटनेबद्दल शोक व्यक्त केला आहे. मिळालेल्या माहितीनुसार, 30 भाविक तिरुपत्तूरजवळील डोंगरी मंदिरात देव दर्शनासाठी गेले होते. मंदिराकडे जात असताना त्यांची मिनी बस अनियंत्रित होऊन दरीत कोसळली. पोलिसांनी दिलेल्या माहितीनुसार, जखमींना रुग्णालयात पाठवण्यात आले असून, त्यांच्यावर उपचार सुरू आहेत. 

पोलिसांनी दिलेल्या माहितीनुसार, पुलियूर गावातील सुमारे 30 लोक जिल्ह्यातील सेम्बराईच्या टेकडीवर असलेल्या मंदिराकडे जात असताना हा अपघात झाला. एका पोलीस अधिकाऱ्याने सांगितले की, घाट रोडवरील एका वळणावर बोलत असताना  चालकाचे वाहनावरील नियंत्रण सुटले, ज्यामुळे हा अपघात झाला.

पोलिसांनी दिलेल्या माहितीनुसार, अपघातातील अकरा मृतांमध्ये सहा महिला आणि पाच मुलींचा समावेश आहे. याप्रकरणी गुन्हा दाखल करण्यात आला असून पुढील तपास सुरू असल्याचे पोलिसांनी सांगितले.

मुख्यमंत्री एमके स्टॅलिन यांनी शोकसंतप्त कुटुंबियांप्रती शोक व्यक्त केला आहे. त्यांनी मृतांच्या नातेवाईकांना प्रत्येकी 2 लाख रुपये आणि जखमींना प्रत्येकी 50,000 रुपये मदत जाहीर केली आहे. मृतांबद्दल शोक व्यक्त करताना स्टॅलिन म्हणाले की, जिल्हा सरकारी रुग्णालयात जखमींवर तातडीने उपचार करण्याचे आदेश अधिकाऱ्यांना दिले आहेत.