दिल्लीनंतर आता बंगळुरूमधील 40 शाळांना बॉम्बस्फोटाची धमकी,शोध मोहीम सुरू

राजधानी दिल्लीनंतर, भारताची सिलिकॉन व्हॅली म्हणून ओळखल्या जाणाऱ्या बंगळुरूमधील 40 शाळांना बॉम्बच्या धमक्या मिळाल्या आहेत. त्यानंतर बंगळुरू प्रशासन सतर्क झाले आहे. बंगळुरू पोलिसांनी सांगितले की, आज बंगळुरू शहरातील आरआर नगर आणि केंगेरीसह 40 खाजगी शाळांना बॉम्बच्या धमकीचे ईमेल आले आहेत. त्यानंतर शहरातील सर्व शाळांमध्ये शोध आणि चौकशी सुरू करण्यात आली आहे.

अलीकडेच दिल्लीतील शाळांना अशाच प्रकारच्या धमक्या मिळाल्यानंतर ही घटना उघडकीस आली आहे. राजराजेश्वरी नगर, केंगेरी आणि शहरातील इतर भागातील शाळांना धमकीचे ईमेल पाठवण्यात आले.

माहिती मिळताच, बेंगळुरू पोलिसांनी तातडीने कारवाई केली आणि बॉम्ब निकामी पथकांसह बाधित शाळांमध्ये शोध मोहीम सुरू केली. शाळा प्रशासनाने खबरदारी म्हणून विद्यार्थ्यांना घरी पाठवले आणि परिसर रिकामा केला. आतापर्यंत तपासात कोणत्याही शाळेतून स्फोटके किंवा संशयास्पद साहित्य सापडलेले नाही, परंतु पोलिस ते गांभीर्याने घेत आहेत.

पोलिस अधिकाऱ्यांच्या म्हणण्यानुसार, शुक्रवारी सकाळी धमकीचे ईमेल पाठवण्यात आले होते आणि त्यात शाळेच्या परिसरात बॉम्ब असल्याचा दावा करण्यात आला होता. बंगळुरू पोलिस आयुक्तांनी सांगितले की, सायबर क्राइम सेलला या ईमेलचा स्रोत शोधण्याचे काम सोपवण्यात आले आहे. दिल्ली आणि बंगळुरूमध्ये मिळालेल्या ईमेलची भाषा आणि वेळ सारखीच आढळून आल्याने, दहशत पसरवण्याचा हा सुनियोजित प्रयत्न असू शकतो, असा प्राथमिक तपासात संशय आहे.

Edited By - Priya Dixit