उत्तर प्रदेशात भाविकांनी भरलेली बोलेरो कालव्यात पडली, 11 जणांचा मृत्यू

उत्तर प्रदेशातील गोंडा जिल्ह्यात एक भीषण अपघात घडला. येथे एक बोलेरो गाडी नियंत्रण गमावून कालव्यात पडली. या अपघातात 11 जणांचा मृत्यू झाला, तर एक बेपत्ता आहे. तर, तीन जणांना वाचवण्यात यश आले आहे. मृतांपैकी नऊ जण एकाच कुटुंबातील असल्याचे सांगितले जात आहे.

इटियाथोकच्या बेलवा बहुता कालव्याच्या पुलावर हा अपघात झाला. बोलेरोमधील सर्व लोक पृथ्वीनाथ मंदिरात जलाभिषेकासाठी जात होते. हे लोक मोतीगंज पोलिस स्टेशन परिसरातील सिहागावचे रहिवासी होते. गाडीत 15 लोक होते. पाण्यात बुडून 11 जणांचा मृत्यू झाला. तर, एक जण बेपत्ता आहे. 

अपघात झाला तेव्हा हलका पाऊस पडत होता असे सांगण्यात येत आहे. कालव्याजवळचा रस्ता निसरडा आणि खूपच अरुंद होता. बोलेरोला बाजूने ओव्हरटेक करण्याचा प्रयत्न करत असताना अचानक गाडी घसरली आणि कालव्यात उलटली. गाडी पूर्णपणे पाण्यात बुडाली. त्यामुळे प्रवाशांना बाहेर पडण्याची संधी मिळाली नाही.

स्थानिक लोकांनी सांगितले की सकाळी ६ वाजताच्या सुमारास मोठा आवाज ऐकू आला. काही वेळातच लोक घटनास्थळी पोहोचले तेव्हा त्यांना बोलेरो कालव्यात पडल्याचे दिसले. गावकऱ्यांनी तात्काळ पोलिसांना कळवले आणि स्वतःहून बचावकार्य सुरू केले. नंतर प्रशासन आणि एनडीआरएफ टीमने मदतीचा हात हाती घेतला.

या घटनेत मृत्युमुखी पडलेल्या भाविकांची ओळख पटवण्याची प्रक्रिया सुरू आहे. प्रशासनाने सर्व मृतदेह शवविच्छेदनासाठी पाठवले आहेत. पीडित कुटुंबांना सर्वतोपरी मदत करण्याचे आश्वासन देण्यात आले आहे.

अपघाताची दखल घेत मुख्यमंत्री योगी आदित्यनाथ यांनी शोकसंतप्त कुटुंबांप्रती संवेदना व्यक्त केल्या आहेत. त्यांनी अधिकाऱ्यांना घटनास्थळी पोहोचून मदतकार्य जलदगतीने करण्याचे निर्देश दिले आहेत. जखमींवर योग्य उपचार करण्याचे निर्देशही त्यांनी दिले आहेत. मृतांच्या कुटुंबियांना 5 लाख रुपयांची आर्थिक मदत देण्याचे निर्देश मुख्यमंत्र्यांनी दिले आहेत. 

Edited By - Priya Dixit