हरिद्वारमध्ये सीडीएस बिपिन रावत आणि पत्नी मधुलिका यांच्या अस्थिकलशाचे मुलींनी विसर्जन केले
तामिळनाडू हेलिकॉप्टर दुर्घटनेत ठार झालेले सीडीएस जनरल बिपिन रावत आणि त्यांच्या पत्नी मधुलिका रावत यांच्या अस्थी शनिवारी हरिद्वार येथील गंगेत विसर्जित करण्यात आल्या. रावत यांच्या दोन्ही मुलींनी आई-वडिलांच्या अस्थिकलशाचे विसर्जन केले. जनरल रावत आणि मधुलिका रावत यांच्या मुली कृतिका आणि तारिणी यांनी आज सकाळी दिल्ली कॅन्टोन्मेंटमधील बेरार स्क्वेअर स्मशानभूमीतून त्यांच्या पालकांच्या अस्थी गोळा केल्या.दिल्लीहून लष्कराचे एक विमान सीडीएस जनरल रावत यांच्या अस्थी घेऊन जॉली ग्रँटसाठी रवाना झाले.जॉली ग्रँट विमान तळावरून रस्त्याने अस्थिकलश हरिद्वार आणले.व्हीआयपी घाटावर वैदिक मंत्रोच्चारात त्यांच्या अस्थींचे विसर्जन करण्यात आले. त्यासाठी लष्कराच्या तुकडीसह बँड घाटावर पोहोचला होता. जनरल बिपिन रावत यांच्या दोन्ही मुलींनी शुक्रवारी पाणावलेल्या डोळ्यांनी त्यांच्या पालकांवर अंत्यसंस्कार केले.
चीफ ऑफ डिफेन्स स्टाफ रावत आणि त्यांच्या पत्नी मधुलिका रावत यांच्यावर दिल्ली कॅंटमधील बेरार स्क्वेअर स्मशानभूमीत शुक्रवारी अंत्यसंस्कार करण्यात आले. रावत यांच्या मुलींनी त्यांच्या पालकांच्या पार्थिवावर मुखाग्नी दिली.. जनरल रावत आणि त्यांच्या पत्नीवर संस्कृतमधील मंत्रोच्चारात पूर्ण लष्करी सन्मानाने अंत्यसंस्कार करण्यात आले. निर्धारित प्रोटोकॉलनुसार त्यांना लष्कराच्या बँडच्या तालावर 17 तोफांची सलामीही देण्यात आली. त्याच्या दोन्ही मुली - तारिणी आणि कृतिका - यांनी अंतिम संस्कारांशी संबंधित सर्व विधी पार पाडले.
