ट्रेनच्या डब्यात कर्मचाऱ्याकडून लघवी!
Railway employee urinated in the AC coach of the train एमपी न्यूज : एका रेल्वे कर्मचाऱ्याने चालत्या ट्रेनच्या एसी डब्यात लघवी केल्याची घटना मध्य प्रदेशात समोर आली आहे. या घटनेचा व्हिडिओ सोशल मीडियावर प्रचंड व्हायरल होत आहे. पश्चिम मध्य रेल्वेच्या जबलपूर विभागाला या घटनेची चौकशी करण्याचे आदेश देण्यात आल्याचे सांगण्यात येत आहे. दोषी कर्मचाऱ्याचीही ओळख पटली आहे. 9 ऑगस्ट रोजी रेल्वे कर्मचारी दिल्लीत आंदोलनात सहभागी होण्यासाठी जात असताना ही घटना घडली.
9 ऑगस्टच्या रात्री जबलपूरहून निघालेल्या हजरत निजामुद्दीन संपर्क क्रांती एक्स्प्रेसच्या एसी कोचमध्ये (बी-6) लघवीची ही घटना घडल्याचे सांगण्यात येत आहे. जबलपूर ते निजामुद्दीन या मार्गावर सर्व प्रवासी झोपले असताना रेल्वे कर्मचारी दशरथ कुमारने सीटवर लघवी केली. यावेळी उपस्थित काही रेल्वे कर्मचाऱ्यांनी त्याचा व्हिडिओ बनवला. हा कर्मचारी जबलपूर रेल्वे विभागातील यांत्रिकी विभागात कार्यालयीन अधीक्षक पदावर कार्यरत असल्याचे सांगण्यात येत आहे.
10 ऑगस्ट रोजी दिल्लीत नवीन पेन्शन योजनेसंदर्भात देशव्यापी आंदोलनात सहभागी होण्यासाठी रेल्वे कर्मचारीही संपर्क क्रांती एक्स्प्रेसने जात होते. सोमवारी या निर्लज्ज घटनेचा व्हिडीओ व्हायरल होताच रेल्वे प्रशासनाने त्याची गांभीर्याने दखल घेतली असून, घटनेचे गांभीर्य लक्षात घेऊन कर्मचाऱ्याची ओळख पटवून त्याच्यावर कारवाई करण्याच्या सूचना देण्यात आल्या आहेत.
सीपीआरओ राहुल श्रीवास्तव यांनी दिलेल्या माहितीनुसार ही घटना जबलपूर रेल्वे विभागातील आहे. रेल्वे प्रशासनाने या घटनेची गंभीर दखल घेतली आहे. दोषी कर्मचाऱ्यावर कारवाईची तयारी सुरू आहे. तसेच जबलपूर रेल्वे विभागाच्या एका उच्चपदस्थ अधिकाऱ्याने सांगितले की, दोषी कर्मचाऱ्याची ओळख पटली असून त्याच्यावर आरोपपत्र देऊन कारवाई करण्यात येत आहे.
