तेजस एक्स्प्रेसमध्ये दिल्या जाणाऱ्या नाश्त्यामध्ये आळी, रेल्वेमंत्र्यांकडे ट्विट करून तक्रार
अहमदाबाद- गुजरातमध्ये हॉटेल्स आणि रेस्टॉरंटमधील अन्न दूषित झाल्याच्या घटना अनेकदा समोर आल्या आहेत. अशा अनेक घटना मोठ्या शहरांमध्ये घडल्या आहेत. मात्र रेल्वे यंत्रणेच्या प्रीमियम ट्रेनच्या नाश्त्यात आळी दिसल्यानंतर घटनेने प्रवाशांमध्ये भीतीचे वातावरण निर्माण झाले आहे. अहमदाबादहून मुंबईला जाणाऱ्या तेजस एक्स्प्रेस ट्रेनमध्ये प्रवास करणार्‍या तरुणाने आयआरसीटीसीच्या नाश्त्याबद्दल ट्विट करून IRCTC आणि रेल्वेमंत्र्यांकडे तक्रार केली.
तरुणाच्या ट्विटनंतर आयआरसीटीसीने प्रतिक्रिया दिली
मिळालेल्या माहितीनुसार आज सकाळी अहमदाबादमधील एका तरुणाने ट्विटद्वारे आयआरसीटीसी आणि रेल्वेमंत्र्यांकडे तक्रार केली आणि सांगितले की, जेव्हा मी तेजस एक्सप्रेस ट्रेनने अहमदाबादहून भरूचला जात होतो तेव्हा मला दिलेल्या नाश्त्यामध्ये एक आळी दिसली. मी जेवण खाल्ले असते तर जबाबदार कोण? मी अर्धा नाश्ता केला आणि मला काही झाले तर कोण जबाबदार असेल? याप्रकरणी काय कारवाई होणार? तरुणाच्या ट्विटनंतर आयआरसीटीसीने उत्तर दिले की, असा कटू अनुभव हा आमचा हेतू नव्हता. अशी घटना पुन्हा घडू नये यासाठी आम्ही योग्य ती पावले उचलू आणि या संदर्भात तुमच्याशीही संपर्क साधला जाईल.
एवढी प्रीमियम ट्रेन असूनही निष्काळजीपणा दाखवण्यात आला
तक्रारदार प्रियान शाह यांनी प्रसारमाध्यमांना दिलेल्या मुलाखतीत सांगितले की, ते आज सकाळी तेजस एक्सप्रेसने अहमदाबादहून भरूचला जात होते. त्यानंतर त्यांना ट्रेनमध्ये सकाळचा नाश्ता देण्यात आला. उपमाचा अर्धा भाग खाल्ल्यानंतर त्यातून आळी निघाली. उपस्थित कर्मचाऱ्यांना ही माहिती देताना त्यांनी आम्ही या प्रकरणाची दखल घेऊ, आम्ही कारवाई करू, असे सांगितले. मात्र आजतागायत याबाबत कोणतीही कार्यवाही झालेली नाही. या प्रकरणाची मी ट्विट करून तक्रारही केली आहे. मात्र कोणतीही कार्यवाही झालेली नाही. एवढी प्रिमियम ट्रेन असूनही त्यात निष्काळजीपणाचा दिसून येत आहे.
प्रवाशांमध्ये तीव्र नाराजी
रेल्वेने प्रवास करणाऱ्या प्रवाशांना चांगले आणि दर्जेदार जेवण हवे असते. मात्र अशा तक्रारी वारंवार येतात. वंदे भारत एक्स्प्रेस, तेजस एक्स्प्रेस, शताब्दी ट्रेनसह सुपरफास्ट एक्स्प्रेस गाड्यांमध्ये प्रवासी जास्त भाडे देऊन प्रवास करतात. नाष्टा आणि जेवणाचे पैसेही प्रवासी देतात, मात्र दर्जेदार जेवण मिळत नसल्याच्या तक्रारी वारंवार येतात. त्यानंतर याप्रकरणी प्रवाशांमध्ये प्रचंड असंतोष आहे.
