शिरूरमध्ये बिबट्याच्या हल्ल्यात महिला ठार

शिरूर मध्ये जांबूत येथे बिबट्याच्या हल्ल्यात ७० वर्षीय महिलेचा दुर्दैवी मृत्यू झाला. यामुळे परिसरात संतापाची लाट उसळली आहे. या महिलेचे नाव भागुबाई जाधव आहे.  

मिळालेल्या माहितीनुसार २२ तारखेला सकाळी ६ वाजता महिला लघुशंका करण्यासाठी घराबाहेर पडली होती. बिबट्या शेजारी उसाच्या शेतात बसला होता. बिबट्याने तिच्यावर  हल्ला केला आणि तिला  उसाच्या शेतात ओढले. या महिलेचा जागीच मृत्यू झाला. त्याच परिसरात वारंवार होणाऱ्या हल्ल्यांमुळे रहिवाशांमध्ये भीती आणि संतापाचे वातावरण निर्माण झाले आहे.

परिसरात अजूनही मोठ्या प्रमाणात बिबट्या दिसत असल्याचे ग्रामस्थांचे म्हणणे आहे. वन विभागाने घेतलेल्या सध्याच्या उपाययोजनांना नागरिकांनी तीव्र विरोध केला आहे आणि संतापातून हा कठोर निर्णय घेतला आहे. संतप्त ग्रामस्थांनी सांगितले की, जिल्हाधिकारी स्वतः घटनास्थळी भेट देऊन बिबट्याच्या व्यवस्थापनाचा ठोस अहवाल देईपर्यंत ते अंत्यसंस्कार करणार नाहीत. या घटनेने मानव-बिबट्या संघर्षाची तीव्रता अधोरेखित केली आहे.  

Edited By- Dhanashri Naik