झारखंडच्या खुंटीमध्ये स्कूटरस्वाराला वाचवण्याचा प्रयत्न करणाऱ्या लोकांना ट्रेलरने चिरडले; ७ जणांचा दुर्दैवी मृत्यू
खुंटीमध्ये एक भीषण रस्ते अपघात घडला. कर्रा पोलीस ठाण्याच्या हद्दीतील कोसंबी कॉलनीजवळ एका अनियंत्रित १८ चाकी ट्रेलरने अनेक लोकांना चिरडले. या अपघातात चार महिला आणि तीन मुलांचा मृत्यू झाला.
मिळालेल्या माहितीनुसार झारखंडच्या खुंटी जिल्ह्यात एक भीषण रस्ते अपघात घडला आहे. गुरुवारी रात्री कर्रा पोलीस ठाण्याच्या हद्दीतील कोसंबी कॉलनीजवळ रस्त्यावर एका अनियंत्रित १८ चाकी ट्रेलरने लोकांना चिरडले. या भीषण अपघातात सात जणांचा जागीच मृत्यू झाला, तर इतर दोघे गंभीर जखमी झाले. मृतांमध्ये चार महिला आणि तीन मुलांचा समावेश आहे. प्रत्यक्षदर्शींच्या म्हणण्यानुसार, रात्री सुमारे १०:१५ वाजता एका स्कूटरस्वाराचे नियंत्रण सुटले आणि तो रस्त्याच्या कडेला असलेल्या झुडपात पडला. गोंधळ ऐकून, जवळचे गावकरी त्या स्कूटरस्वाराला वाचवण्यासाठी घराबाहेर धावले. काही तरुण झुडपात अडकलेल्या स्कूटरस्वाराला बाहेर काढण्याचा प्रयत्न करत होते, तर महिला आणि मुले रस्त्याच्या कडेला उभे राहून पाहत होती. त्याचवेळी वेगाने येणाऱ्या एका अनियंत्रित ट्रेलरने रस्त्याच्या कडेला उभ्या असलेल्या नऊ जणांना धडक दिली. या घटनेनंतर पोलिसांनी ट्रेलर जप्त केला असून, मृतदेह शवविच्छेदनासाठी पाठवले आहे.
