अबू आझमी यांची तुकाराम मुंडे यांना निवडणूक आयुक्त म्हणून नियुक्त करण्याची मागणी
महाराष्ट्रातील समाजवादी पक्षाचे नेते अबू आसिम आझमी म्हणाले की, उत्तर प्रदेशात केवळ दोनच पक्ष सरकार स्थापन करू शकतात: भाजप किंवा समाजवादी पक्षाची आघाडी. राहुल गांधींनी अखिलेश यादव यांच्या नेतृत्वाखाली निवडणूक लढवावी. त्यांनी ज्ञानेश कुमार यांच्या जागी तुकाराम मुंडे यांना मुख्य निवडणूक आयुक्त म्हणून नियुक्त करण्याची मागणीही केली.
समाजवादी पक्षाचे महाराष्ट्र अध्यक्ष आणि आमदार अबू आझमी यांनी निवडणूक आयोगावर मतदार यादीतील अनियमितता आणि मतचोरीचे गंभीर आरोप केले आहे. त्यांनी आयोगाच्या राजीनाम्याची आणि संबंधित अधिकाऱ्यांवर कठोर कारवाईची मागणी केली आहे. याशिवाय, अबू आझमी यांनी १ नोव्हेंबर रोजी होणाऱ्या इंडिया अलायन्सच्या रॅलीत जास्तीत जास्त लोकांनी सहभागी होण्याचे आवाहन केले आहे. आझमी म्हणाले की, मतदार यादीतील कथित अनियमितता देशाच्या संविधानाला आणि लोकशाहीला धोका निर्माण करते. यावेळी त्यांनी इम्रान खान यांच्यावरील कायदेशीर खटला, उत्तर प्रदेशातील काँग्रेस आणि समाजवादी पक्षाची युती, तसेच पंतप्रधान नरेंद्र मोदी यांच्याबद्दल मल्लिकार्जुन खर्गे यांनी केलेल्या वक्तव्यांवरही आपले मत व्यक्त केले. झालेल्या सर्व निवडणुकांमध्ये मतचोरी आणि अनियमिततेची प्रकरणे समोर आली आहेत, असा आरोप अबू आझमी यांनी केला. निवडणूक आयोग भाजपच्या सांगण्यावरून काम करत असल्याचा आरोप करत, आयोगाच्या कार्यपद्धतीमागील सत्य उघड झाले आहे, असे ते म्हणाले. जबाबदार अधिकाऱ्यांना तात्काळ निलंबित करून त्यांच्यावर कायदेशीर कारवाई करावी, अशी मागणी त्यांनी केली.
तसेच आपले वैयक्तिक मत व्यक्त करताना ते म्हणाले की, जर तुकाराम मुंडे यांना निवडणूक आयोगाची जबाबदारी दिली, तर अधिक चांगले काम होऊ शकेल.
