लक्झरी उलटून भीषण अपघात; तीन चिमुकल्यांचा दुर्दैवी अंत

मुखेड (जि. नांदेड) येथून खाजगी लक्झरी बस (ए.एच. 04 जी.पी. 5151) ही मुंबईकडे निघाली होती. रात्री बारा वाजण्याच्या सुमारास बस बार्शी क्रॉस करून कुर्डूवाडीमार्गे मुंबईकडे जात होती. सव्वा बारा वाजण्याच्या सुमारास बस वांगरवाडी शिवार आल्यानंतर चालकाचा बसवरील ताबा सुटल्याने बस उलटली. रात्रीच्या प्रवासात सर्व प्रवाशी झोपलेले असताना वेगात असलेली बस अचानक उलटल्याने प्रवासी सावध होण्याआधीच अनेकजण बसच्या खाली अडकले. घटनेची माहिती मिळतताच बार्शी तालुका पोलीस ठाणचे सहायक पोलिस निरीक्षक राहुल देशपांडे व त्यांच्या सहकार्‍यांनी मदतकार्य सुरू केले. रात्रीच्यावेळी मदतीसाठी मनुष्यबळ कमी असल्याने उलटलेल्या बसखाली अडकलेले प्रवाशी काढण्यासाठी पोलिसांना जेसीबी मशीन आणावी लागली. बस पन्नास फुटांपर्यंत घसरत जाऊन त्याच्या खाली सापडून आर्वी मोहन देवकते (रा. विंदगी खुर्द ता. अहमदपूर जि. लातूर), फैज इस्माईल पठाण (वय 3 रा. दामूननगर आदिवली मुंबई), धनश्री ज्ञानेश्वर मुकनेर रा. हिप्परगा (शहा) ता. कंदार जि. नांदेड) या तिघींचा अंत झाला.