मुंबईच्या धारावीचा कायापालट होणार, १०,४३२ घरांच्या बांधकामाला सुरुवात
अदानी एंटरप्रायझेसचे संचालक प्रणव अदानी यांनी सोमवारी २२ एकर माटुंगा रेल्वे स्थळावर पुनर्वसन गृहनिर्माण प्रकल्पाचा शुभारंभ केला. यासह, अदानी समूहाने आशियातील सर्वात मोठी झोपडपट्टी असलेल्या धारावीतील पात्र रहिवाशांसाठी १०,४३२ घरांच्या बांधकामाला सुरुवात केली आहे.
धारावी पुनर्वसन प्रकल्पासाठी स्थापन करण्यात आलेल्या विशेष उद्देश कंपनी (SPV) अदानी नवभारत डेव्हलपर्स प्रायव्हेट लिमिटेड (ANDPL) द्वारे विकसित करण्यात येत असलेल्या या प्रकल्पात १० टॉवर्स, १०,४३२ पुनर्वसन फ्लॅट्स आणि १,३७९ व्यावसायिक व औद्योगिक युनिट्सचा समावेश असेल, असे अदानी एंटरप्रायझेसने सोमवारी एका निवेदनात म्हटले आहे.
अदानी एंटरप्रायझेसचे संचालक प्रणव अदानी म्हणाले, "प्रत्येक कुटुंबाला असे घर मिळायला हवे, जिथे त्यांना सुरक्षित वाटेल आणि ते भविष्यासाठी योजना आखू शकतील. धारावीतील कुटुंबांसाठी हे किती महत्त्वाचे आहे, याची आम्हाला जाणीव आहे. माटुंगामध्ये आम्ही १० टॉवर्स उभारत आहोत, ज्यात १०,४३२ घरे आणि १,३७९ व्यावसायिक व औद्योगिक युनिट्स असतील. यातून आम्ही असे वातावरण निर्माण करत आहोत, जिथे कुटुंबे उत्तम जीवन जगू शकतील आणि आपल्या मुलांसाठी एक उज्ज्वल भविष्य घडवू शकतील."
या प्रकल्पांतर्गत, पात्र रहिवाशांना ३५० चौरस फुटांचे फ्लॅट्स मिळतील. माटुंगामध्ये घरे मिळवणाऱ्यांमध्ये सेक्टर ६ आणि सेक्टर १ मधील रहिवाशांचा समावेश असेल, त्यानंतर धारावीतील इतर पात्र रहिवाशांना प्राधान्याने अंदाजे ४,५०० फ्लॅट्स उपलब्ध करून दिले जातील. महाराष्ट्र शासनाच्या नगरविकास विभागाचे अतिरिक्त मुख्य सचिव, असीम कुमार गुप्ता, या समारंभाला विशेष अतिथी म्हणून उपस्थित होते.
धारावीच्या रहिवाशांना बालवाडी, सामुदायिक सभागृह, पोडियम गार्डन इत्यादी सुविधा मिळतील
"या प्रकल्पामध्ये कुटुंबांसाठी सुरक्षित आणि आधुनिक घरांची निर्मिती , तसेच उत्तम जीवनमानासाठी आवश्यक पायाभूत सुविधा आणि सोयीसुविधांचा समावेश आहे. मटुंगा येथे बांधण्यात येणाऱ्या पुनर्वसित इमारतींमध्ये बालवाडी, सामुदायिक सभागृह, पोडियम गार्डन आणि बसण्याच्या जागांचा समावेश असेल," असे अदानी समूहाने एका निवेदनात म्हटले आहे.
प्रत्येक पुनर्वसित इमारतीमधील दहा टक्के व्यावसायिक जागा, सामायिक पायाभूत सुविधांच्या देखभालीसाठी महसूल मिळवण्याकरिता राखीव ठेवली जाईल. हस्तांतरणानंतर पहिल्या दहा वर्षांसाठी इमारती आणि सामायिक पायाभूत सुविधांच्या देखभालीची जबाबदारी अदानी नवभारत डेव्हलपर्स प्रायव्हेट लिमिटेडची असेल.
