नवजात बाळ ३.५ लाख रुपयांना विकले, अमरावतीत रुग्णालय सील, डॉक्टरला अटक
अमरावतीमध्ये नवजात बाळाला ३.५ लाख रुपयांना विकण्याची तयारी केल्याचे प्रकरण उघडकीस आले आहे. फ्रेझरपुरा पोलिसांनी एका डॉक्टरला अटक केली असून, महिला डॉक्टर आणि तिचा पती फरार आहे. महानगरपालिका आरोग्य विभाग आणि पोलिसांनी बुटी प्लॉट येथील रुग्णालय सील करून कागदपत्रे जप्त केली आहे.
एका अल्पवयीन मुलीच्या प्रसूतीनंतर तिच्या नवजात बाळाला ३.५ लाख रुपयांना विकण्याच्या कथित प्रयत्नाच्या प्रकरणामुळे अमरावतीमध्ये खळबळ उडाली आहे. फ्रेझरपुरा पोलिसांनी या प्रकरणात डॉ. मयूर उत्तम धांडगे यांना अटक केली आहे. दरम्यान, महिला डॉक्टर डॉ. वैशाली भोजाने आणि तिचा पती प्रफुल्ल भोजाने फरार असल्याचे वृत्त आहे. बुधवारी, पोलीस आणि महानगरपालिका आरोग्य विभागाच्या संयुक्त कारवाईत बुटी प्लॉट येथील रुग्णालय सील करण्यात आले. पोलिसांनी रुग्णालयातून महत्त्वाची कागदपत्रेही जप्त केली.
मिळालेल्या माहितीनुसार, पीडित मुलीने १५ ऑक्टोबर रोजी त्याच रुग्णालयात एका मुलीला जन्म दिला. दुसऱ्या दिवशी घरी परतल्यानंतर, तिला दोन महिलांकडून समजले की तिच्या नवजात बाळाला ३.५ लाख रुपयांना विकण्याची तयारी सुरू आहे. त्यानंतर पीडित मुलगी तिच्या आईसोबत डॉक्टरकडे गेली. तिथे तिला नवजात बाळाच्या ताब्यावरून वाद सुरू असल्याचे समजले. अमरावती पोलीस निरीक्षक राजेंद्र राजुलवार आणि महानगरपालिका वैद्यकीय अधिकारी विशाल काळे यांच्या उपस्थितीत रुग्णालय उघडून त्याची झडती घेण्यात आली. या कारवाईदरम्यान महत्त्वाची कागदपत्रे जप्त करण्यात आली. रुग्णालयाची प्रसूती, सोनोग्राफी आणि वैद्यकीय गर्भपात (एमटीपी) केंद्रेही सील करण्यात आली.
