राहुरीमध्ये मोठा पेच: देवेंद्र फडणवीसांच्या एका फोननंतर प्राजक्त तनपुरेंनी घेतली निवडणुकीतून माघार?
राहुरी विधानसभा मतदारसंघातील पोटनिवडणुकीच्या पार्श्वभूमीवर राजकीय घडामोडींना वेग आला आहे. भाजपचे उमेदवार अक्षय कर्डिले यांच्याविरोधात सक्षम आव्हान उभे करू शकणारे शरद पवार गटाचे नेते आणि माजी राज्यमंत्री प्राजक्त तनपुरे हे भाजपमध्ये प्रवेश करणार असल्याच्या चर्चा जोर धरत होत्या. मुख्यमंत्री फडणवीस यांच्या राहुरीतील सभेदरम्यान त्यांच्या प्रवेशाची शक्यता वर्तवली जात होती. मात्र, प्रत्यक्षात असा कोणताही प्रवेश झालेला नाही. तरीही, सभेत फडणवीस यांनी तनपुरे यांचे जाहीर आभार मानत नव्या राजकीय समीकरणांना वाव दिला.
सभेत बोलताना फडणवीस यांनी सांगितले की, त्यांनी प्राजक्त तनपुरे यांना फोन करून पोटनिवडणुकीतून माघार घेण्याची विनंती केली होती. शिवाजीराव कर्डिले यांच्या निधनामुळे निर्माण झालेल्या परिस्थितीचा विचार करून परंपरेनुसार निर्णय घ्यावा, असे त्यांनी सांगितले. या विनंतीला प्रतिसाद देत तनपुरे यांनी अल्पावधीतच निवडणुकीतून माघार घेतली, याबद्दल त्यांनी त्यांचे सार्वजनिक आभार मानले.
दरम्यान, तनपुरे भाजपमध्ये जाणार का याबाबत अद्याप स्पष्ट निर्णय घेतलेला नसला तरी त्यांच्या हालचालींमुळे राहुरीतील राजकारण चांगलेच तापले आहे. विशेष म्हणजे, या सगळ्या चर्चेमुळे उमेदवार अक्षय कर्डिले यांच्यापेक्षा तनपुरे यांचीच जास्त चर्चा रंगताना दिसत आहे.
सभेत फडणवीस यांनी अक्षय कर्डिले यांच्यावर विश्वास व्यक्त करताना म्हटले की, दिवंगत शिवाजीराव कर्डिले यांच्यापेक्षा अधिक प्रेम आणि पाठिंबा अक्षयला दिला जाईल. प्रलंबित कामे पूर्ण करण्याची हमी देत त्यांनी “राज्याच्या तिजोरीचा बेरर चेक” देत असल्याचेही सांगितले. राहुरी एमआयडीसीचे पुनरुज्जीवन, कृषी विद्यापीठातील अतिरिक्त जागेचा औद्योगिक वापर, तसेच कर्जमाफी, शेतकऱ्यांना दिवसा वीज आणि भविष्यात मोफत वीज पुरवठा यांसारख्या घोषणाही त्यांनी केल्या.
याशिवाय, लाडकी बहीण योजना सुरूच राहील, असे स्पष्ट करत महिला मतदारांना मोठ्या प्रमाणावर मतदानाचे आवाहन करण्यात आले. विरोधकांवर टीका करताना महिला आरक्षण विधेयकाला विरोध केल्याचा आरोपही त्यांनी केला.
शिवाजीराव कर्डिले यांच्या कार्याचा उल्लेख करत फडणवीस म्हणाले की, ते अत्यंत धोरणी आणि जनतेशी निगडित राजकारणी होते. नेतृत्व घडवण्याची आणि राजकीय रणनीती आखण्याची त्यांची हातोटी विशेष होती. आजारपणातही त्यांनी विश्रांती न घेता जनतेची सेवा सुरू ठेवली.
निळवंडे आणि वांबोरी चारी प्रकल्पांचा उल्लेख करत त्यांनी विकासकामांबाबतची बांधिलकीही व्यक्त केली. वांबोरी चारीसाठी निधी मंजूर केल्याचे सांगत, पाणीसाठा वाढवण्यासाठी धरणांतील गाळ काढण्याचे कामही हाती घेणार असल्याचे त्यांनी नमूद केले.
