टीका आणि ट्रोल करण्यासाठी बुद्धीची गरज नाही

टीका आणि ट्रोल करण्यासाठी बुद्धीची गरज नाही. एक कलाकार म्हणून निर्माता म्हणून आपण आपले काम केले पाहिजे. हा चित्रपट माझ्याकडे आला तेव्हा मला या चित्रपटात एकच गोष्ट दिसली. ती म्हणचे या चित्रपटाची कथा. जर चित्रपटातील माहिती सर्वांना मिळणे गरजेचे आहे तर तुम्ही चित्रपटात नायकाची किंवा खलनायकाची भूमिका साकारता याने काही फरक पडत नाही. तुम्ही हिरो आहात, व्हिलन आहात, या गोष्टी माझ्यासाठी अजिबात महत्त्वाच्या नाहीत. होय, हे खरे आहे की, नथुराम गोडसे हे पात्र तुम्ही साकारले तर अपोआप वादांमध्ये अडकणार. कारण हे एक वादग्रस्त पात्र आहे. मात्र मी माझ्यावर होणाऱ्या टीकेवर विचार करत बसू शकत नाही. माझे काम अभिनय करणे आहे. वाद घालणे हे माझे काम नाही, या शब्दांत चिन्मय मांडलेकरने ट्रोल करणाऱ्यांना आणि टीकाकारांना सडेतोड प्रत्युत्तर दिले आहे. 

दरम्यान, दमदार चित्रपटांनी बॉलिवूड गाजवणारे दिग्दर्शक राजकुमार संतोषी तब्बल नऊ वर्षांनी मोठ्या पडद्यावर पुनरागमन करत आहेत. ‘गांधी-गोडसे एक युद्ध’ या चित्रपटाची एक झलक पाहायला मिळाली होती. आता या चित्रपटाचा ट्रेलर प्रदर्शित झाला आहे. या चित्रपटाला संगीत ए. आर. रहमान यांचे आहे. 

Edited by: Ratnadeep Ranshoor