साबुदाणा खिचडी नाही! यंदा आषाढी एकादशीला बनवा स्वादिष्ट रताळ्याचे कटलेट

तसेच यंदा आषाढी एकादशीला साबुदाणा बाजूला ठेवा आणि झटपट बनणारे, कुरकुरीत 'रताळ्याचे कटलेट' बनवा. रताळे आरोग्यासाठी खूप फायदेशीर असते आणि यामुळे शरीराला उपवासाच्या दिवशी भरपूर ऊर्जा मिळते. 

साहित्य-

उकडलेली रताळी: ३ ते ४ (मोठी)

भाजलेल्या शेंगदाण्याचा कूट: ४ ते ५ मोठे चमचे (जाडसर वाटलेला)

हिरव्या मिरच्यांची पेस्ट/बारीक चिरलेली मिरची: १ ते २ चमचे (आवडीनुसार)

राजगिरा किंवा शिंगाड्याचे पीठ: २ ते ३ मोठे चमचे (बायडिंगसाठी)

जिरे किंवा जिरे पूड: १ चमचा (जर उपवासाला चालत असेल तर)

बारीक चिरलेली कोथिंबीर: २ चमचे (जर उपवासाला चालत असेल तर)

उपवासाचे मीठ (सेंधव मीठ): चवीनुसार

तूप किंवा तेल: कटलेट शॅलो फ्राय करण्यासाठी

कृती-

सर्वात आधी उकडलेली रताळी सोलून एका मोठ्या भांड्यात व्यवस्थित मॅश (कुस्करून) करून घ्या. रताळ्यात गाठी राहणार नाहीत याची काळजी घ्या. आता या मॅश केलेल्या रताळ्यामध्ये भाजलेल्या शेंगदाण्याचा कूट, हिरवी मिरची, जिरे पूड, कोथिंबीर आणि चवीनुसार सेंधव मीठ टाका. कटलेट छान कुरकुरीत व्हावेत आणि ते सुटू नयेत म्हणून त्यात राजगिरा किंवा शिंगाड्याचे पीठ घाला. हे सर्व मिश्रण हाताने व्यवस्थित एकत्र करून मळून घ्या. रताळ्यामध्ये स्वतःचा ओलसरपणा असतो, त्यामुळे पाणी टाकण्याची अजिबात गरज पडत नाही. हाताला थोडे तूप किंवा तेल लावून घ्या. मिश्रणाचे छोटे छोटे गोळे करून त्यांना गोल किंवा टिक्की (कटलेट) सारखा छान चपटा आकार द्या. गॅसवर एक नॉन-स्टिक पॅन किंवा तवा गरम करायला ठेवा. त्यावर थोडे तूप किंवा तेल सोडा. तयार केलेले कटलेट तव्यावर ठेवा आणि मध्यम आचेवर दोन्ही बाजूंनी सोनेरी आणि कुरकुरीत (Crispy) होईपर्यंत छान भाजून घ्या. गरमागरम, वरून कुरकुरीत आणि आतून मऊ असणारे हे रताळ्याचे कटलेट तुम्ही उपवासाची गोड दही किंवा ओल्या नारळाच्या चटणीसोबत सर्व्ह करू शकता. यंदाच्या आषाढी एकादशीचा उपवास या स्वादिष्ट आणि हेल्दी रेसिपीने नक्की खास बनवा!

अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत ​​नाही. अधिक माहितीसाठी संबंधित तज्ज्ञांचा सल्ला घ्यावा.

Edited By- Dhanashri Naik