मराठा आरक्षणासाठी आंदोलनकर्ते आज मुंबईला धडक देणार, आझाद मैदानात ठिय्या आंदोलन

कोल्हापूर, नाशिकसह विविध जिल्ह्यांत आंदोलकांची धरपकड सुरू झाल्याने मराठा क्रांती मोर्चाच्या महामुंबईतील समन्वयकांनी सोमवारी आणि मंगळवारी आझाद मैदानात ठिय्या आंदोलन सुरू ठेवण्याचा निर्णय घेतला आहे.

महामुंबईचे समन्वयक वीरेंद्र पवार यांनी सांगितले की, नोकर भरतीला मराठा क्रांती मोर्चाचा तीव्र विरोध आहे. या प्रश्‍नावर चर्चा करण्यासाठी शासनाकडे वेळ मागितली आहे.  विधानसभेतील विरोधी पक्षनेते देवेंद्र फडणवीस यांच्यासोबत सोमवारी चर्चा होणार आहे. तूर्तास तरी महामुंबईतील समन्वयक नोकर भरतीविरोधात आझाद मैदानात ठिय्या आंदोलन करतील.

 सोमवारी अधिवेशनात उपस्थित राहणार्‍या आमदारांची भेट घेऊन आपल्या मागण्या पुढे रेटण्याचा निश्‍चय मराठा क्रांती मोर्चातील महामुंबईमधील समन्वयकांनी केला. मात्र अधिवेशनात यावेळी पास मिळणार नसल्याची माहिती मिळाल्याने आता मंगळवारी दक्षिण मुंबईत आमदारांची तातडीची बैठक आयोजित करण्याचे नियोजन मराठा क्रांती मोर्चाने केले आहे. आमदारांच्या या महत्त्वाच्या बैठकीत मोर्चाची पुढील रूपरेषा ठरणार आहे.