नाकाचं सौंदर्य खुलवण्यासाठी...

काही स्त्रियांच्या नाकाचा आकार चेहर्‍याला साजेसा नसतो. काही स्त्रिया तर त्यांच्या नाकाच्या आकारामुळे इतक्या त्रस्त असतात की, त्या सरळ शस्त्रक्रियेचा पर्याय निवडतात, तर काही स्त्रिया त्यांच्या नाकाच्या आकाराबाबत सतत तक्रारी करत असतात. बेढब नाक सुबक दिसावं, यासाठी शस्त्रक्रियेव्यतिरिक्तसुद्धा काही पर्याय आहेत. जाड नाक बारीक दिसावं, यासाठी सर्वांत आधी नोज पिन किंवा नथ बदला. आपल्या नाकावर कुठली नथ चांगली दिसेल, याबाबत एखाद्या ब्युटीशियनचा सल्ला घ्या. आपल्या नाकात जाड नथ चांगली दिसते की बारीक, हे एकदा निश्चित झालं, की बेढब नाकाची समस्या थोड्या प्रमाणात कमी होते.   

जाड नाक छोटं दिसावं, यासाठी कॉन्टुर मेकअपचा उपयोग होऊ शकतो. कॉन्टुर मेकअप ही एक कला आहे. एखाद्या ब्युटीशियनकडून तुम्ही एकदा कॉन्टुर मेकअप करायला शिकलात, तर घरीसुद्धा तुम्ही हा मेकअप करू शकता. याध्ये मॅट ब्रॉन्जरचा वापर केला जातो. ब्रॉन्जरमुळे चेहरा कॉन्टुर होतो. तो उजळत नाही. यासाठी तुमच्याकडे ब्रॉन्झ मॅट असायला हवं; पण त्यासोबतच कॉन्टुर करणंही जमायला हवं. नाक छोटं दिवसां, यासाठी केसांच्या स्टाइलबाबत विचार करू शकता. हेअरस्टाइलच्या काही प्रकारांमुळे नाकाचा आकार लपवता येतो. यामध्ये एका बाजूला केलेले केस चांगले दिसतात. यासाठी उजव्या बाजूला शक्य तितक्या खाली भांग पाडून अधिकाधिक केस एका बाजूला ठेवा; पण अशा प्रकारचा हेअरकट करण्यापूर्वी तज्ज्ञांचा सल्ला जरूर घ्या. कुरळे केस असलेल्या स्त्रियांच्या नाकाचा लूक बदलण्याच्या दृष्टीने उपयुक्त ठरू शकतील, अशा हेअरस्टाइल्ससुद्धा करता येऊ शकतात.

नाक जास्ती चपटं असेल, तर नाकाच्या दोन्ही बाजूंना चटकन लक्ष जाईल, असं आकर्षक किंवा चमचमत्या रंगाचं ब्लशर किंवा फाउंडेशन लावा. नाकाच्या दोन्ही बाजूंच्या टोकांवर गडद फाउंडेशन आणि मधल्या भागात फिकं फाउंडेशन लावा. यानंतर नाकाच्या हाडाच्या आकाराचं हायलायटर लावा आणि एका गडद छटेचं कन्सिलर त्यात मिसळा. नाकाला योग्य आकार देण्यासाठी या पद्धतीचा उपयोग होईल.