सणासुदीला बनवा खमंग पुरणपोळी! जाणून घ्या साहित्य आणि सोपी कृती

साहित्य
चणा डाळ: १ वाटी (२ तास भिजवलेली)
गूळ: १ वाटी (किसलेला)
गव्हाचे पीठ: १ कप
मैदा: १ कप (किंवा पूर्ण गव्हाचे पीठही वापरू शकता)
वेलची व जायफळ पूड: अर्धा चमचा
चिमूटभर मीठ, हळद
तेल: आवश्यकतेनुसार
तूप: पोळी भाजण्यासाठी

कृती
१. पुरण तयार करण्याची पद्धत:
चणा डाळ स्वच्छ धुवून १ ते २ तास पाण्यात भिजत ठेवा. त्यानंतर कुकरमध्ये ३ कप पाणी आणि चिमूटभर हळद घालून ४-५ शिट्ट्या काढून डाळ मऊ शिजवून घ्या. डाळ शिजल्यावर गाळणीने सर्व पाणी (कट) वेगळे काढून घ्या. (या पाण्याचा वापर तुम्ही झणझणीत कट्याची आमटी बनवण्यासाठी करू शकता). शिजलेली डाळ एका कढईत काढून त्यात १ कप चिरलेला गुळ घाला. मंद आचेवर हे मिश्रण सतत ढवळत राहा. गुळ वितळल्यावर मिश्रण थोडे पातळ होईल, पण सतत ढवळत राहिल्याने ते घट्ट होईल. चमचा पुरणात सरळ उभा राहिला की पुरण तयार झाले असे समजावे. शेवटी वेलची आणि जायफळ घाला. गरम असतानाच हे मिश्रण पुरण यंत्रातून किंवा गाळणीतून फिरवून घ्या. त्यामुळे पुरण एकदम मऊ होते.

२. कणिक भिजवण्याची पद्धत:
एका परातीत गव्हाचे पीठ, मैदा, चिमूटभर मीठ एकत्र करा.
थोडे थोडे पाणी घालून मऊ कणिक मळून घ्या.
कणिक मळल्यानंतर त्यावर २ ते ३ चमचे तेल घालून पुन्हा ४-५ मिनिटे नीट मळून घ्या (कणिक जेवढी मऊ आणि तेलकट असेल, पुरणपोळी तेवढीच छान मऊ होते). ही कणिक ३० मिनिटे झाकून ठेवा.

३. पुरणपोळी लाटणे आणि भाजणे:
मळलेल्या कणकेचा एक लहान गोळा घ्या. त्याची वाटीसारखी घडी करा किंवा छोटी पोळी लाटा.
कणकेच्या गोळ्यापेक्षा थोडा मोठा पुरणाचा गोळा त्या वाटीत ठेवा आणि सर्व बाजूंनी तोंड बंद करून जास्तीची कणिक काढून टाका.गोळा सुक्या पिठात (किंवा मैद्यात) घोळवून हलक्या हाताने कडेकडून पातळ लाटून घ्या. गरम तव्यावर पोळी टाका. एका बाजूने छोटे फुगे आले की पोळी उलटा. दोन्ही बाजूंनी छान शेकल्यावर साजूक तूप लावा. पोळी मस्त टम्म फुगेल!

खमंग आणि मऊ पोळीसाठी खास टिप्स
मऊ कणिक: कणिक जेवढी सैलसर आणि मऊ असेल, पुरणपोळी लाटताना पुरण बाहेर येत नाही.
पुरणाची सुसंगतता: पुरण जास्त पातळ किंवा खूप सुके नसावे. मऊ पुरणामुळे पोळी शेवटापर्यंत छान भरलेली राहते.परतणे: पोळी तव्यावर वारंवार उलटू नका, फक्त दोन-तीन वेळा उलटून तूप लावून शेका म्हणजे ती कडक होणार नाही.गरमागरम पुरणपोळीवर साजूक तुपाची धार, गरम दूध किंवा कटाच्या आमटीसोबत सर्व्ह करा!
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीचीपूर्णता, विश्वासार्हता आणि अचूकता याबाबत वेबदुनिया कोणतीही हमी देत ​​नाही. अधिक माहितीसाठी संबंधित तज्ज्ञांचा सल्ला घ्यावा.