ज्ञानेश कुमार यांनी राजीनामा न दिल्यास, १० ऑक्टोबरला जंतर मंतरवर धडकणार! मुंबईत सीजेपीचा हल्लाबोल

मिळालेल्या माहितीनुसार कॉकरोच जनता पक्षाचे (सीजेपी) नेते अभिजीत दिपके यांनी शुक्रवारी घोषणा केली की, मुख्य निवडणूक आयुक्त (सीईसी) ज्ञानेश कुमार यांनी राजीनामा न दिल्यास १० ऑक्टोबरला दिल्लीतील जंतर मंतरवर आंदोलन केले जाईल. यापूर्वी, गांधी जयंतीनिमित्त मुंबईतील शिवाजी पार्कमध्ये कॉकरोच जनता पक्षाने आयोजित केलेल्या आंदोलनात बोलताना, दिपके यांनी कुमार यांनी पायउतार न झाल्यास दिल्लीत "जंतर मंतर  आंदोलनाचा इशारा दिला होता.

रात्री उशिरा 'एक्स'वर केलेल्या एका पोस्टमध्ये दिपके म्हणाले, "जर ज्ञानेश कुमार यांनी राजीनामा दिला नाही, तर देशभरातील झुरळे दिल्लीवर मोर्चा काढतील आणि १० ऑक्टोबर रोजी जंतर मंतरवर आंदोलन करतील." दिपके म्हणाले की, जर दिल्ली पोलिसांनी त्यांना रोखण्याचा प्रयत्न केला, तर ते जिथे कुठे थांबतील, ते ठिकाणच आमचे जंतर मंतर बनेल. आमचे आंदोलन शांततापूर्ण असेल आणि "आम्ही महात्मा गांधींनी दाखवलेल्या मार्गाचे अनुसरण करू." दिपके  म्हणाले की, शांततापूर्ण आंदोलनाच्या अधिकाराचा आदर करायचा की २० जुलै रोजी झालेल्या क्रूरतेची पुनरावृत्ती करायची, हे ठरवणे सरकार आणि दिल्ली पोलिसांवर अवलंबून आहे.